Parada di Flambeu tabata yen ambiente

ORANJESTAD (AAN): Diasabra anochi den presencia di miembronan di SMAC y di Cuerpo Policial, Prome Minister Sra. Evelyn Wever-Croes a cende e flambeu di Parada di Flambeu pa asina duna inicio na Aruba su Carnaval 70.

E mandatario ta desea tur grupo y participante hopi exito den e temporada di Carnaval y ta desea pa tur hende por goza sanamente y a pidi pa cuida oido di nos muchanan.

E parada a sali exactamente 8'or di anochi dilanti 520 Home Sweet Home na Avenida Milio Croes, cu intencion pa e cabes di e parada yega exactamente 12'or. Cuerpo Policial a haci un control riba e vehiculonan y resulta cu tabatin vehiculonan sin documentonan necesario y a detecta tambe un UTV cu no tabata tin su documento na ordo.

E parada a wordo para temporalmente te ora cu nan por a soluciona e situacion. Despues di e breve interupcion, e parada a sigui su curso y pa 12:43 am, e cabes di e parada a yega na e punto final, cu ta ex-DOW, pa finalmente termina completamente pa 2:58 am di marduga.

E parada a conta cu 11 banda y SMAC a calcula cu por lo menos 9 mil participante a goza di e parada.