Parlamentario Alvin Molina:
ORANJESTAD (AAN): Durante tratamento di Presupuesto 2024 di Pais Aruba, Parlamentario Alvin Molina a presenta un mocion na unda el a urgi Minister di Husticia pa e 'herziening van het beloningsbeleid’ pa e ambtenaarnan di Cuerpo Policial Aruba.
E mocion ta trata e 'continuïteitstoelage', 'piketvergoeding' y ‘overuren’ pa e agentenan policial den tur rango y a wordo aproba unanimamente door di Parlamento di Aruba. Pa hopi aña caba agentenan policial ta ricibi 60 florin pa luna pa traha ‘nachtdienst’. E ‘nachtdienst’ ta un peso grandi riba salud, famia y bida social di e agente policial. E ley cu ta dicta esaki ta anticua. Kisas 40 aña pasa 60 florin tabata un compensacion husto, awendia sigur esey no ta e caso. Tambe, e ley ta exclui hefenan den Cuerpo Policial Aruba di ricibi un compensacion, mientras den hopi ocasion nan ta eherce e mesun trabou cu nan coleganan.
Esey tambe ta un cambio grandi compara cu e tempo cu e ley a wordo traha, e tempo ey e hefenan di polis tabata traha solamente ‘dagdienst’, dialuna pa diabierna. Salvaguardia siguridad di Aruba sa exigi hopi di polis di tur rango. Segun Molina, "pa mi mes dia mi bay bek den Cuerpo Policial Aruba, mi no lo pidi pago pa mi overtime, tampoco pa mi ‘piket’ of ‘avond dienst’, simplemente paso mi tin e custumber caba di 20 aña ta eherce e trabou aki, sin haya un compensacion y honestamente ami ta prefera mi tempo liber. Mi ta kere si cu e ta un topico hopi importante pa tur colega den KPA, mirando cu tin mas di 20 vacatura den “management” cu e agentenan policial lo mester ocupa y nos mester duna nan un incentivo y loke nan merece pa nan tuma e responsabilidad y encargo pa lidera nos Cuerpo Policial Aruba," e parlamentario a conclui.
