Parada Cultural masha bunita y cu un asistencia masal

ORANJESTAD (AAN):  No obstante e tabata un atardi hopi calor, cu casi nada di biento debi na presencia di un Tormenta Tropical den Lama Caribe,

den bario di Brazil, Mabon, y Rooi Koochi a tuma lugar Diadomingo e tan spera ‘Parada Cultural’.

   Aunke solo a percura pa hopi calor, e ambiente tabata uno hopi bunita y a conta cu acogida masal.

   Hopi grupo a desfila y por a mira con nan sonrisa constante tabata demostra con orguyoso nan ta di ta formando parti di e evento.  Sigur un palabra di un pabien grandi na e organizadornan Fundacion Chico Harms, Centro di Bario Brazil y Comision Eleccion y Parada Cultural pa un bunita parada Cultural. Igualmente na tur grupo participante di nos mucha, hoben y adultonan cu a presenta den nan bunita trahe di folklor como tambe na tur banda tipico cu a participa y anima cu nos musica y haci e parada aki uno bunita, grandi yen di ambiente bibando nos cultura.