E tarea di un lider naci na e pais central den gueranan na nivel mundial
- Enfasis ta wordo pone riba paz mundial y balor di e ser humano
- Entrada Papa Leo 14 a cambia e imagen necesario di lider
ORANJESTAD (AAN) Cu mundo durante ultimo añanan ta crea e impresion di falta grandi di liderazgo na diferente nivel importante pa bon funcionamento di sociedad humano, ta algo cu ta papia pa su mes.
Division y mas division ta manifesta su mes rond mundo y ta contribui den creacion di mas problema pa e bienestar directo di hende, cu ta e mandato mas importante di tur persona cu ta considera nan mes lider.
Sucesonan di ultimo simannan ta crea e impresion, cu morto di Papa Francisco directamente a resulta den entrega di un lider pa Iglesia Catolico, cu ta e iglesia mas grandi na mundo y asina tin un impacto tremendo riba desaroyo mundial.
E resultado di eleccion di un Papa nobo cu na un forma historico despues di dos dia ya a wordo presenta na mundo, tabata mucho mas grandi cu generalmente tabata e caso debi na e impacto di e personalidad di e Papa nobo.
Sin duda e factor principal di Papa Leo 14, no ta solamente e hecho cu el a nace na Merca, aunke esaki ta hunga un papel hopi importante, pero e hecho cu tanto su edad como su puntonan di bista y forma di acercamento cu hende rond mundo, tin resultado grandi pa su aceptacion.
DIARIO a papia cu expertonan cu a bise, cu entrada di Papa Leo 14 tabata hustamente na e momento cu mundo ta en busca di liderazgo nobo, cu ta distancia di formulanan cu a faya den pasado.
Ora bolbe den historia ta topa cu e hecho cu na Siglo 20, gueranan a destrui mundo na tur forma pero a crea un economia despues di Segundo Guera Mundial cu no a permiti mundo atende situacionnan cu a keda pega.
A wordo mustra cu por papia di un division serio entre e generacionnan di guera y e generacion nobo di despues di guera.
E generacion nobo despues di guera, cu por a haci uzo di metodonan nobo pa comunica cu otro, a lanta para contra gueranan horibel y perdida di balor di hende.
Esaki hustamente a conduci na cambio di moral debi na e hecho cu e generacion cu a nace despues di guera, no por a mira e beneficio di hende den e mundo nobo cu a wordo crea y cada rato tabata afecta balor di hende mas.
Manera a bini dilanti pa Aruba e situacion di epoca 0 y 80 no a bini tan cerca pero si na Europa y Estados Unidor, caminda hobennan mester a bay bringa entre otro na Vietnam, cu a deshaci di tur balor di hende.
Ta den e atrocidad di Guera di Vietnam, por topa cu confrontacionnan entre hobennan y nan mayornan pero tambe falta di e seguridad humano cu a percura pa droga entre otro por a plama rond mundo, cu nunca mas a conoce paz real.
Durante fin di siman, lidernan mundial a topa na Roma caminda Papa Leo 14 a wordo oficialmente instala na un momento cu tin duda serio kico lo pasa cu guera di Ukraine y kico por spera di e alianza di NATO cu tambe ta den problema pa profila su mes.
Den un incertidumbre grandi ayera Papa Leo 14 a entrega na mundo su base, cu ta sostene e speranza cu como lider di Iglesia Catolico e lo colabora den cambionan importante riba tereno di asuntonan humano.
Papa Leo 14, cu a sorprende mundo pa e forma con el a brasa su ruman sin reserva y a deshaci di na varios ocasion di costumbernan innecesario y cu ta crea distancia cu hende.
Papa Leo 14 a mustra cu Iglesia Catolico a wordo funda den amor pa Dios y mester ta un unidad cu ta habri su brasanan pa mundo cu e mester transforma den un cielo pa tur ser humano.
E pontifice nobo directamente a papia di paz pa Ukraina y pidi oracion pa loke ta pasa na Gaza , caminda mucha y anciano mester muri di hamber.
E ceremonianan na Roma a entrega den fin di siman prueba di un epoca den cual e liderazgo Catolico na Vaticano ta bolbe na e luchanan di e generacion despues di guera na cual e Papa nobo tambe ta pertenece y cu a lanta para contra gueranan cruel cu a destrui hende y bienestar di hende.
Un impacto grandi e postura di Papa Leo 14 tin actualmente riba comunidad internacional cu tur resultado cu esaki por tin riba bienestar di hende na hopi parti di mundo, caminda respet pa bida humano a yega na un fin.
Informantenan cu cual DIARIO a discuti e desaroyonan actual, a mustra cu den e problemanan mundial serio, un lider nobo a presenta y tin e capacidad necesario pa sostene e lucha pa paz y dignidad di hende, cu e era di descubrimento y avance intelectual di decada 70 y 80, a aborta.
