ORANJESTAD (AAN): Aunke e eventonan di Soul Beach Music Festival lo no tuma lugar mas na Aruba durante e conocido ‘Memorial Day weekend’,
por a nota con ultimo dia ta hopi ex-fanatico di e Festival ta yegando e isla aki toch.
E aña aki e Festival a muda pa isla di St. Maarten. Y a bin haya sa cu tin hopi turista di Merca kendenan den pasado tabata bishita cada uno di e Festivalnan aki sin falta uno, awor a dicidi cu nan ta prefera goza di nan dianan di ‘Memorial Day weekend’ na Aruba, envez di St. Maarten.
Y nan ta yegando hopi trempan caba! Desde siman pasa nan ta yegando y e motibo aparentemente ta cu nan tin Time-share cumpra na Aruba, y nan no por a haya forma pa ‘cambia’ nan estadia pa St. Maarten.
Pues danki na e experiencia positivo di Festivalnan anterior, subrayando con dushi nan a pasa na Aruba, nan a prefera di bin pasa dianan bao solo na Aruba mes.
E Festival na St. Maarten lo bay ta for di dia 21 di Mei te cu 26 di Mei 2025.
