Joyce Pereira, Presidente di Fundacion Lanta Papiamento:
ORANJESTAD (AAN) Fundacion Lanta Papiamento, a yama un conferencia di prensa, den cual su Presidente, señora Joyce Pereira, a anuncia un celebracion cu lo tuma lugar dia 21 di Mei, kiermen Diaranzon di e siman aki.
Pereira a menciona cu nan tin un grupo nobo cu a cuminza funciona for di principio di April di e aña aki, y nan a cuminza mesora cu preparacion di un actividad cu ta sumamente importante.
“Dia 21 di Mei, nos ta celebra cu Papiamento a bira Idioma Oficial, 22 aña pasa. Anto, nos no por laga esaki pasa sin mas, pasobra ta hopi importante si un idioma ta oficial den un pais, pasobra tin ley e ora ey cu ta sosten’e y tin masha hopi regla cu mester tene cuenta cu ne”, Joyce Pereira a indica.
El a agrega cu tin e “Landsverordening officiële Talen” cu ta pone Papiamento oficialmente banda di Hulandes. Esey kiermen cu tur caminda mester tene cuenta cu Papiamento ta Idioma Oficial.
“Un di e reglamentonan ta bisa cu si un departamento tin un documento cu tin cu sali, e tin cu haci’e tanto na Papiamento como na Hulandes. Pa enseñanza esaki kiermen tambe cu Papiamento por drenta enseñanza”, Joyce Pereira a señala.
Pereira a relata cu en realidad mester bisa cu den e 22 añanan aki, a logra un ke otro. Papiamento a bira na cierto momento materia den scol secundario, a tarda masha hopi mes p’e drenta scol basico.
“A lo largo tabatin un proyecto di innovacion di enseñanza preparatorio y enseñanza basico; nan a haci masha hopi trabao, desaroyo di material, desaroyo di curriculum, p’e por a drenta scol basico.
Anto e ora ey a cuminza cu un proyecto piloto: Proyecto Scol Multilingual. Anto, esey a tuma lugar y a base di e resultadonan di scol multilingual, a dicidi na un cierto momento cu e idea mes, mester bay na tur scol basico”, Joyce Pereira a señala.
El a sigui bisa cu na September 2024, a cuminza actualizacion na Papiamento pa e muchanan di scol basico. “Lamentable si ta, cu e actualizacion ey, unda e muchanan ta haya Papiamento como materia, pero tambe como lenga di instruccion, ta bay dura te cu final di klas 3. Anto despues, na klas 4 ta pasa pa Hulandes, y e pregunta cu nos tin y cu nos ta cuestiona masha hopi mes, ta di con a tuma e decision ey”, Joyce Pereira a subraya.
Pereira a señala cu te ainda no tin nada cu Papiamento bay scol como idioma di instruccion importante, den scol secundario.
“Nos sa cu prensa tambe tin cu haci hopi trabao na su dominio di Papiamento. Mi ta kere cu pronto nos lo organiza encuentro cu prensa pa esnan cu kier drecha nan Papiamento. En todo caso, loke nos kier haci dia 21, ta hereda un forma di concientizacion pa nos Idioma Nacional cu enberdad no ta nada otro cu e weso di lomba di nos cultura.
Si nos mira bon, tur cos ta Papiamento den nos comunidad, cu excepcion di scol cu tin ainda Hulandes, como Idioma di Instruccion” Joyce Pereira, Presidente di Fundacion Lanta Papiamento, a remarca.
