Luenne Gomes-Pieters, directora:
ORANJESTAD (AAN)- Directora di Departamento di Impuesto, Luenne Gomes-Pieters, a duna di conoce den entrevista cu DIARIO, cu DIMP a keda cla cu digitalizacion di e cartanan di obhecion.
DIMP a ripara cu tin varios comentario of pregunta, con a para cu e retraso cu tin pa atende e cartanan di obhecion cu a wordo entrega.
Gomes-Pieters a bisa cu DIMP tin un plan hopi specifico, unda cu den cuadro di Landspaket nan ta bay haya fondonan necesario pa por tin un ekipo dedica, banda di e ekipo di Departamento di Impuesto, cu ta dedicando caba na e retraso cu nan tin.
“Nos lo cuminza atende cu esey, pero tambe nos kier facilita e contribuyentenan cu entrante e siman aki, ya caba ta posible pa nan cuminza entrega cartanan di obhecion, via nos portal ‘Bo Impuesto’.
Nos comerciantenan ta custumbra caba na entrega nan formularionan di BBO, loonbelasting, den nos portal ‘Bo impuesto’ manera nos conoce, y awo nos ta habri e posibilidad pa nos contribuyentenan individual y e comerciantenan cu tin obhecion tocante un cobranza pa por entrega esaki na un forma digital.
Nos ta custumbra di entrega cartanan via papel, of via e-mail. Esaki tin su riesgonan cu ne, no solamente cu papel por perde pero tambe cu e Inspector di Impuesto no por atend’e cu e volumen cu nos ta atend’e cu ne”, Gomes-Pieters a subraya.
Directora di Impuesto a indica cu pa luna DIMP ta registra sigur, dos mil pa tres mil carta di obhecion, y si no structura esaki na un forma digital. Nan por a registra nan mucho mas lihe, cu no ta di e forma manual cu nan a bay antes pero na un manera digital, cu e Inspector por atende, e cartanan di obhecion di biaha, na un forma hopi mas pro-activo y activo.
Directora di DIMP a splica kico ta un carta di obhecion pa esnan cu no sa ainda. “Esaki ta ora un contribuyente no ta di acuerdo cu un cobranza di impuesto cu el a ricibi, y pa ley e tin derecho di haci obhecion contra e cobranza, dentro di dos luna despues di e fecha di e cobranza. Inspeccion di Impuesto ta evalua e obhecion, naturalmente, y ta dicidi si ta ahusta e cobranza of no”, Gomes-Pieters a señala.
El a agrega cu na final, e contribuyente ta ricibi un contesta den forma di un beschikking. Te awe e entrega di carta di obhecion ta sosode por escrito of via e-mail, sea e contribuyente ta trece personalmente na DIMP, of ta haci’e via e-mail.
“Sinembargo e formanan di entrega esaki ta ineficiente, manera mi a menciona, tanto pa e contribuyente como pa e departamento di impuesto.
