Palabranan di gratitud pa e bishitantenan di Teatro di Curaçao

ORANJESTAD (AAN): Departamento di Cultura Aruba ta gradici e actriz, maestra y directora di Teatro renombra di Curaçao,

sra Laura Quast cu a bin Aruba riba su mesun forsa, pa brinda su tremendo aporte y su maraviyoso sosten brinda durante di Celebracion di Dia Mundial di Teatro 2023 cu a tuma luga na Cas di Cultura Aruba, riba Dia Mundial di Teatro, esta 27 di maart y cu a forma parti protagonico den e Homenahe Postumo: “Aplauso pa Burny”, dirigi exitosamente pa e maestra y directora, sra Amy Lasten conhuntamente cu su elenco di actornan local.

   Laura Quast a trece riba escenario, un fragmento di e obra “Un anochi largo”, cu den bida, Burny Every (qepd), a dirigi na Curaçao cu cuatro actriz renombra manera su persona, Laura Quast, como tambe: Rina Penso, Greta Trapenberg y Mila Palm.

   Tabata un berdadero privilegio di por tin su persona hunto cu nos aki na Aruba, na unda nos por a disfruta di su experiencia den e ramo teatral cu su excelente control escenico y di bos y su sobresaliente actuacion representa den un fragmento cu ta papia pa su mes y cu a ser expresa cu tur tecnica di mundo, cu un poderoso dominio dramatico y di caracterisacion, cu a resalta su personalidad asombroso, captando atencion di un y tur den un presentacion digno di un gran dama di teatro.

   Di e forma aki nos ta sigui estrecha nos lasonan di union entre nos islanan ruman y entre nos artistanan talentoso den Caribe, cu ta carga cu pasion e arte teatral cu tanto magistralidad y pasion.

   Masha pabien y masha danki pa su contribucion y su valioso aporte significativo, cu ta garantisa parti di e desaroyo di Teatro aki na Aruba.