Otmar Oduber, lider di PNP ta cuestiona:
ORANJESTAD (AAN) – Den conferencia di prensa, e Lider di Plataforma Nos Pais, Otmar Oduber, a elabora riba dos punto hopi importante y esun prome cu el a trece dilanti ta e vision y pensamento cu tin, como Plataforma Nos Pais, riba un ley cu PNP ta yama “Ley BEL” (Beneficio Economico Laboral).
“Manera ta conoci, nos Plataforma ya caba for di 23 di Januari di e aña aki, pues mas of menos cinco luna pasa, a dirigi un carta na Prome Minister señora Evelyn Wever-Croes, unda nos a papia riba diferente punto pa loke ta trata gastonan den gobierno. Nos a papia riba e hecho cu nos ta sinti cu, lamentablemente, ki ora cu tin medidanan so tin atencion di parti di e gremionan di nos comunidad, di gobierno mes y di opositornan politico”, Oduber a señala.
El subraya cu por mira cu ora cosnan ta bon y trankil, ningun hende ta corda mas riba e gastonan di gobierno aki. E Plataforma tabata tin proposicionnan categorico, di cual a papia den e carta, unda a bisa cu nan kier mira un discusion na nivel nacional tuma lugar, unda tur partido politico, paden y pafo di gobierno, gremionan tuma parti na dje. “Un dialogo nacional cu no ta conta pa e gobierno aki pasobra nos ta na caminda pa eleccion otro aña y nos sa cu aworaki ningun cambio por tuma lugar mas, pero si for di awo caba nos por mara e proximo gobierno na decisionnan cu ta wordo tuma den conhunto”, Otmar Oduber a relata.
El subraya cu esaki ya sea un signature Gel, Berde, or Ros, ki color cu por ta, pa aki un aña hiba e dialogonan. “Si sinceramente, nos kier ta abierto cu comunidad di Aruba, unda nos ta bisa cu nos ta bay discuti, entre otro, riba e necesidad cu un gobierno na Aruba tin siete, ocho of nuebe minister of si cu cinco minister lo no ta suficiente”, Otmar Oduber a bisa.
Oduber a bisa cu por mira e calidad di carteranan cu tin na e momentonan aki, cu tin biaha bo no sa mes cu cierto persona ta minister, pasobra e cartera cu e ta carga no tin e peso cu mester tin un cartera separa. “Discusion cu nos por hiba awo, prome cu tin eleccion otro aña”, Oduber a expresa. “Na cierto momento nos mester por papia hasta di cambionan constitucional cu mester cuminza tuma lugar”, el a agrega.
Pakico pueblo di Aruba cu 21 miembro di Parlamento? “Un di e criticanan grandi cu mi tabata tin durante henter e periodo aki, awo nos ta bay touch un biaha mas ta cu bo no ta sinti cu Parlamento ta haci e trabao di un rol di representante di pueblo”, lider di Plataforma Nos Pais a remarca.
