Paisnan a keda satisfecho cu Aruba su maneho riba cambio climatico

Forum y reunion trilateral na European Commission na Bruselas

ORANJESTAD (AAN):  Diahuebs 29 di februari, e delegacion di Aruba cu ta na Bruselas pa e Ministerial Conference OCTA 2024 a atende un forum na e European Commission. Pa e forum aki Aruba tawata representa pa Prome Minister Evelyn Wever-Croes.

            Aki nan a reuni e 13 paisnan cu ta forma parti di OCTA hunto cu e paisnan miembro di Union Europeo, Hulanda, Francia y Dinamarca. Durante e forum aki cu a trata diferente tema importante y tambe a tuma luga un reunion trilateral. E reunion aki tawata entre e 6 islanan di OCTA Hulandes; Aruba, Corsou, Boneiro, Saba, Sint Eustatius y Sint Maarten, Hulanda y e European Commission. Pa Hulanda tawata presente Secretario di Estado Alexandra van Huffelen.

            Durante e reunion aki tawata tin un interes grandi den e maneho y vision di Aruba riba e tereno di energia. Akinan Prome Minister Evelyn Wever-Croes a duna un splicacion amplio riba e maneho cu Aruba tin pa loke ta trata e cambio climatico. Aruba tin un council cu ta atende cu cambio climatico y pa esaki a alinea tur stakeholder na Aruba den un National Energy Policy.

            Esaki a keda cla un par di aña pasa durante Gabinete Wever-Croes I tempo Prome Minister tawata tin e cartera di Energia y cu e actual Minister di Energia Glenbert Croes a sigui cu n’e y ya esaki ta den practica.

            Prome Minister a sigui profundisa riba e maneho di e cambio climatico y a informa esnan presente cu e meta ta pa na aña 2030 Aruba ta depende solamente 50% riba crudo y 50% riba energia mas limpi. E intencion ta pa transiciona di energia a traves di gas LNG y despues yega na e situacion ideal di hidrogeno. Prome Minister tambe a splica durante e reunion cu Aruba ta tene su mes na palabracionnan di e Acuerdo di Paris apesar cu Aruba no ta un pais ratifica pa esaki. Aruba ta spera cu paisnan grandi cu ta susha hopi mas tambe ta tene nan mes na e acuerdo aki.

            Prome Minister tambe a informa riba e echo cu na aña 2023 hunto cu Hulanda, a organisa e prome Caribbean Energy and Climate Conference na Aruba, esaki den colaboracion cu Minister di Energia di Hulanda Rob Jetten y Minister di Energia Glenbert Croes.

            E paisnan presente a keda hopi satisfecho cu e informacion y splicacion ricibi di Prome Minister riba e maneho di e reto grandi cu ta e cambio climatico y e transicion pa energia mas limpi y akinan Prome Minister a remarca cu esaki ta un compromiso cu tur pais a haci y awor mester cumpli cu ne pa asina atende mihor cu e medio ambiente y baha e uso di 'heavy fuel oil'.

            Otro paisnan a papia di otro tipo di retonan cu nan tin pero e tema di energia ta algo cu constantemente a bin dilanti.