Minister di Labor a reuni cu gremionan comercial tocante e necesidadnan riba mercado laboral

ORANJESTAD (AAN):   Diahuebs mainta, Minister di Labor Glenbert Croes a reuni cu Aruba Hotel and Tourism Association (AHATA),

Aruba Trade & Industry Association (ATIA), Comerciantenan Uni Aruba (CUA), y Camara di Comercio (KVK).

            Meta di e reunion tabata pa Comercio vocifera nan preocupacion referente e retonan cu nan ta hayando riba e mercado laboral y falta di trahado.

            Minister Croes a indica cu durante e reunion, nan a discuti riba tur e necesidadnan cu tin actualmente.

            E mandatario a expresa e boluntad cu ta existi di parti di Gobierno y di Ministerio di Labor en particular pa bin cu solucionnan concreto pa coopera pa soluciona e retonan existente riba mercado laboral. Tambe a pasa riba tur e areanan cu ta den necesidad di trahado inmediato, pero semper respetando e maneho cu e yiunan di tera ta haya prioridad.

            E necesidad di trahado riba mercado ta urgente y mester atende cu esaki y haya su debido atencion.

            E maneho di Gobierno semper lo duna preferencia na nos hendenan local y unabes cu esey ta cubri lo pasa na busca inmigrantenan cu ta bibando na Aruba cu mester di trabou. Pa cu esaki ministerio di labor lo coopera cu comercio door di haci e proceso di DPL y DIMAS mas eficiente, eficaz y transparente. E scarcedad laboral ta un responsabilidad di nos tur y comercio y gobierno mester traha hunto pa nos logra cumpli cu e demanda laboral.

            Pa por yega na solucionnan concreto pa mehoracion den area laboral, a keda palabra cu señora Tisa LaSorte di AHATA y consehero huridico di Ministerio di Labor, Glendeline Croes, lo lidera un "taskforce", na unda lo pone tur e recomendacionnan di tur locual Comercio mester. Esaki lo wordo adapta y adopta como maneho. Unabes cu e proposicion aki ta cla, Gobierno lo ehecut’e, apoyando asina e sector principal di pais Aruba, cu ta turismo.

            Minister Glenbert a expresa cu e reunion tabata uno positivo, y a compromete su mes pa traha na bienestar di comunidad di Aruba, mehorando tur aspecto di e mercado laboral.