ORANJESTAD (AAN): E Strategia di Cooperacion Subregional Conhunto lo provee un cuadro coordina pa cooperacion tecnico pa atende cu retonan comun di salud publico den Caribe,
a wordo firma diamars pa Director di e Organisacion Panamericano di Salud (PAHO), Dr. Jarbas Barbosa y Dr. Carlatte, Secretario General di 'Caribbean Community' (CARICOM).
E Strategia lo cubri e 15 Estadonan Miembro di CARICOM: Antigua y Barbuda, Bahamas, Barbados, Belize, Dominica, Grenada, Guyana, Haiti, Jamaica, Montserrat, Saint Kitts and Nevis, Saint Lucia, Saint Vincent and the Grenadines, Surinam, y Trinidad y Tobago, como tambe su miembronan asocia: Anguilla, Bermuda, British Virgin Islands, Cayman Islands, y Turks and Caicos.
“E firma aki ta marca un logro den un asociacion di hopi tempo cu ta ancra den confianza, respet mutuo, y un vision comparti pa salud y bienestar di e pueblonan di Caribe,” segun Dr. Barbosa, durante e ceremonia di firma, cu a tuma luga durante e bishita oficial di e Director di PAHO na Guyana e siman aki.
“Caribe ta enfrenta retonan di salud publico unico y interconecta – for di e peso creciente di malesanan no transmisibel, te na e menasa continuo di cambio di clima, te na e necesidad pa transformacion digital y sistemanan di salud mas fuerte y resiliente,” e director a agrega. “E retonan aki no ta stop na fronteranan, y nos solucionnan tampoco.”
Gradiciendo Dr. Barbosa pa su colaboracion continuo, Dr. Carla N. Barnett, Secretario General di CARICOM a destaca cu e acuerdo aki “ta un momento historico den nos asociacion cu PAHO, cu a resulta instrumental den enfoca nos politicanan di salud y nos maneho di salud puplico, y percupa pa nos cuida e salud di nos hendenan den nos comunidad.”
Pa Dr. Frank Anthony, Minister di Salud di Guyana, “e strategia aki ta afirma cu salud no ta djis un servicio, e ta un derecho. Den Caribe, e derecho ey no mester wordo dicta door di unda bo ta biba, door di bo entrada, of bo edad.”
E strategia di cooperacion ta delinea cinco prioridad strategico pa e cooperacion tecnico di e Organisacion den e subregion:
- Mehora resiliensia di sistemanan di salud basa riba cuido di salud primario;
- Avansa adaptacion di clima, mitigacion, preparacion y contesta pa calamidad pa mehora sostenibilidad ambiental y seguridad di salud;
- Fortalece accion multisectoral pa vigilancia, prevencion y control di NCD, violencia, lesionnan, condicionnan di salud mental y nan factornan di riesgo; Den e area aki, PAHO y paisnan den Caribe lo colabora pa desaroya politica pa mitiga e factornan di riesgo di malesanan no transmisibel (NCD). Como tambe implementacion di iniciativanan di maneho di NCD, incluyendo PAHO su Miho Cuido pa NCD y strategianan di eliminacion di cancer di matriz.
- Avansa e prevencion, control y eliminacion di malesanan transmisibel di prioridad a traves di coordinacion subregional;
- Mehora cooperacion tecnico a traves di asociacionnan, mobilizacion di recurso y defensa. Esaki ta inclui e desaroyo di un cuadro subregional den cooperacion cu CARICOM pa mehora mobilizacion di recurso, y tambe compromiso cu esnan cu ta tuma decision pa atende asuntonan di salud.
“Mientras nos ta firma e Strategia aki, laga nos tambe renoba nos compromiso pa traha hunto – no solamente como institucionnan, pero como aliadonan, y como un comunidad mara na proposito comun,” Dr. Barbosa a conclui.
