Satisfecho cu e prome graduacion
ORANJESTAD (AAN) Señor Carlos Martinus, director di “Openbaar Avond Beroespsonderewijs Aruba” (OABA), y e Cuerpo cu ta yuda nan, ta hopi contento igual cu su docentenan pasobra esaki tabata un aña hopi bon pa e institucion.
“Despues di dos aña nos tabata tin e prome graduacion, nos prome diploma uitreiking, y nada menos y nada mas cu 56 alumno a haya nan diploma; 34 studiante a haci asistent, y 22 di nan a haci MBO nivel 2, ekivalente na esun di EPB den dia.
E 34 alumnonan asistent hopi di nan ta alumnonan cu nunca antes tabata tin un diploma, cu di un manera of otro nan no por a caba nan estudio na EPB, of na MAVO, y awo nan tin nan prome diploma.
Awo caba mi por bisa cu di e 34 eynan, 22 di nan ta bay sigui cu nivel 2. Y di e 22 cu a caba ya mi sa cu gran parti a pidi pa bay nivel 3. Asina nos ta bay zorg pa nos tin nos mesun sistema pa cada nivel. Nos ta OABA ta duna nivel 1,2,3 y 4” Director, señor Martinus a señala.
El a agrega cu nan a cambia di cuater anochi pa tres anochi, unda cu un anochi e studiante tin cu haci su “self” estudio, en su propio ambiente di cas, y el a resulta bon. “Mi tin cu bisa si, cu anochi e ta keda un scol cu su retonan. Hopi biaha e alumnonan ta traha, nan ta ‘on call’, nan no por yega, of nan a traha laat, nan no ta bira na tempo, pero mi tin cu bisa cu al fin y al cabo, e 56 alumno cu a caba a mustra te na final, cu nan por a deal cu e presion di e tres anochinan, e presion di e opleiding, pasobra e nivel ta mescos cu den dia”, director Carlos Martinus a expresa.
El a subraya cu cada alumno cu ta scoge pa bin studia anochi, OABA ta purba guia nan lo miho posible, e lesnan ta digital, kiermen tin hopi manera pa nan studia na cas y si perde un anochi no a perde les pasobra por sigui cu ne, y e docentenan ta purba guianan otro, cu locual nan ta custumbra di haci den dia.
