ORANJESTAD (AAN): Organizacion Pan Americano di Salud (PAHO) a haci un yamada urgente na tur pais di continente Americano,
incluyendo Caribe, pa aumenta vigilancia, incluyendo deteccion den laboratorio, y haci secuencia genomico di casonan confirma, debi cu a bin descubri un variante nobo di e virus di Mpox, esta Clade I den e region sub-Sahara Africano.
Den un alerta epidemiologico, PAHO a bisa cu aunke e variante nobo no a wordo raporta den continente Americano ainda, toch paisnan tin di keda alerta pa cualkier posible caso di importacion.
Riba Diabierna, PAHO a indica cu e variante nobo ta wordo asocia cu transmision sosteni, como tambe e ocurencia di casonan den un rango mas amplio di gruponan di edad compara cu brotenan anterior, incluyendo muchanan.
Nan ta calcula cu el a sali for di Republica Democratico di Congo na September 2023 y ta wordo asocia cu un aumento significante di casonan na e pais, segun PAHO.
Mpox ta un malesa viral causa pa e virus di monkeypox, un especie di e genus Orthopoxvirus.
PAHO a splica cu dos diferente clades ta existi: clade 1 y clade II. Sintomanan ta inclui keintura, dolor intenso di cabez, dolor di musculo, dolor di lomba, energia abao, kliernan hincha, y un rash na cuero of lesion mucosal.
E rash ta concentra su mes riba cara, palma di mannan, y parti abao di pia, pero por wordo localisa den boda, region genital, y wowonan. Sintomanan ta dura entre 2 pa 4 siman, y lo desaparece riba nan mes sin mester tratamento.
Di comienso di 2024 te cu 26 di Juli cu a pasa, PAHO a indica cu Congo a raporta 14.479 caso di Mpox, y 455 morto. Casonan di e variante nobo a wordo raporta tambe na Rwanda, Uganda, y Kenya. Ta haciendo test pa check si tin casonan na Burundi tambe.
