E lucha pa husticia di victimanan di abuso sexual tabata su causa
*Reconocimento di un gran trahador y luchador pa su pais Aruba
*Na su nomber ta entrega posibilidad di Castigo Minimo na Parlamento
ORANJESTAD (AAN) — Si tin un topico cu mas necesidad pa sigui wordo atende, ta e accionnan cu mester tuma contra e abuso sexual di mucha y otro personanan cu sea pa nan sexo of nan falta di posibilidad pa defende nan mes, ta bira victima di abusador.
Pa e realidad di e crimen aki bini dilanti, mundo tabata tin mester di personanan manera Hyacintha Thijsen-Trimon cu na un forma sumamente special, a entrega na mi persona e necesidad di cumplimento di uno di e deber mas sagrado di periodismo, cu ta defensa di tur cu no por defende nan mes contra abuso.
Na momento cu na April 2024, porfin mundo a dicidi cu e hora a yega pa haci e crimen horibel aki e causa grandi di mundo pa mucha, un relacion special a brota entre persona di Hyacintha Thijsen-Trimon y su familia y mi persona, cu na e momento no por a pensa mes, cu no tabata tin hopi tempo pa traha riba e proyecto grandi den bida di Hyacintha.
Mundo a regala mi amistad y confiansa di un persona unico den mi bida. Hyacintha no tabata tin miedo di uza su propio experencianan doloroso y cu ta wordo scondi pa berguenza falso den comunidad mundial, cu asina pa demasiado tempo a stroba di presenta e realidad di victimanan di abuso sexual y sigur di muher y mucha cu no por defende nan mes.
Castigo minimo mester wordo introduci, tabata e lucha di Hyacintha cu a entrega e sentimentonan mas doloroso cu un mucha por a conoce pa asina su dolor no wordo comparti cu tanto mucha na mundo den casonan cu ta keda scondi.
Ora nos a cuminsa cu e tarea pa informa Aruba sin reserva, un relacion special a surgi entre mi persona y Hyacintha cu asistencia di esposo Jani y su otro miembronan di familia, mientras sin cu ningun hende por e haci nada, e berdad doloroso cu salud di Hyacintha tabata bay atras, a bira keda bez mas realistico.
Realidad di un dama, cu a sirbi su pais sin reserva na tanto forma. Den otro articulonan sigur nos lo sigui papia di e labor inmenso di Hyacintha, asisti pa Jani, pa e bario di Savaneta, caminda e tin programa di asistencia comtinuo na habitantenan cu den problema.
Den esaki e ta ricibi asistencia di comerciantenan cu ta kere den su persona y cu a permiti e pareha traha solamente pa personanan di poco recurso y sigur ancianonan cu no por a atende pa nan mes.
Little League entre otro por a conta cu Hyacintha cu durante nos combersacionnan constante, tabata interumpi cada rato cu su labor pa su grandinan tabata spera.
Durante ultimo luna a bira evidente cu salud di Hyacintha a bay atras. Diabierna mi a wordo informa, cu ya el a prepara pa bay ocupa e lugar den cielo cu sin duda a spera e persona cu a entrega su mes na su pais sin reserva y hasta a usa su propio experencia amargo, pa exigi solucion pa e problema cruel di abuso sexual pa muchanan.
Diadomingo 12 or di merdia mi tabata prepara pa cuminsa cu trabou. E mensahe a drenta. Hyacintha Thijsen-Trimon a bay cas.
Danki mi ta yama Hyacintha pa e forma cu el a entrega mi material pa duna cumplimento na e tarea mas importante di periodismo cu ta sali na defensa di esnan cu no por defende nan mes.
Sin duda tin fiesta den cielo cu yegada di Hyacintha.
Mi profundo condolencia na Jani Thijsen y tur otro miembro di familia, mientras sigur lo mi sigui cu e lucha contra abuso di menornan di edad, cu Hyacintha a pone den mi man y di DIARIO.
Descansa na paz, Hyacintha den braza di nos Dios cu bo a sirbi na Aruba.
