E problema cu airco:
*Aeropuerto a pone prioridad riba seguridad di pasahero
ORANJESTAD (AAN): Aeropuerto di Aruba ta reconoce e gran impacto cu e paralisacion di nan operacion a causa Diabierna, debi na un problema tecnico cu 39 buelo a cancela, afectando plan di biahe di mas o menos 4,000 pasahero.
Durante e anochi di Diahuebs pa Diabierna, un problema tecnico serio a tuma luga den nan sistema di airco debi na un ruptura di e “chiller pipe” principal. Esaki a resulta den cambio di temperatura den e terminal, creando un ambiente calor cu por compromete salud y siguridad di tur esunnan presente.
Segun oficialnan di Aeropuerto, despues di delibera, a tuma e decision dificil pa para tur operacion temporalmente y cera e aeropuerto. E paso aki tabata esencial pa garantisa e siguridad di tur pasahero, empleado y e comunidad di aeropuerto. Mirando cu no tabatin solucion inmediato disponibel pa drecha e airco den tempo corto, tabata necesario pa tuma medida proactivo pa preveni riesgo di salud relaciona cu temperatura halto y e humedad riba e piso cu ta forma door di e condensacion debi na cambio di temperatura.
Pa garantisa siguridad di tur pasahero, a evalua disponibilidad di camber di hotel. Hopi camber tabata reserva caba pa pasahero cu ta yega, pero cu ceramento di aeropuerto, toch por a acomoda nan, pa duna pasahero cu no por a biaha mas, un luga comfortable pa keda mientras cu ta atende e situacion.
Diasabra habri bek: Riba Diasabra mainta trempan, e sistema di airco a funciona atrobe y a logra acomoda tur pasahero. Asina a trahando di cerca cu tur aerolinea pa maneha “rebooking” di vuelo y asina sigura cu pasahero afecta ta haya e sosten necesario.
AUA Airport ta pidi disculpa na tur pasahero pa e inconveniencia cu esaki a causa. E siguridad di pasahero y empleado ta keda nan prioridad den tur decision. AAA ta aprecia e comprension y sosten mientras cu a nabega e desafio aki.
