ORANJESTAD (AAN): Cu temporada di horcan 2025 oficialmente a cuminsa riba 1 di juni y ta dura te cu 30 di november,
Organisacion Panamericano di Salud (PAHO) ta pidi paisnan pa revisa nan plannan di contingencia y pone na marcha medida preventivo pa prepara e sistema di salud pa posibel horcan, tormenta, inundacion y otro evento meteorologico extremo. E yamado ta bin despues di un pronostico di NOAA (National Oceanic and Atmospheric Administration) di Merdia, cu ta predeci un temporada di horcan “mas activo cu normal”.
“Evento hidrometeorologico extremo, manera horcan, awacero, inundacion y derumbe cu ta sigui despues, ta un amenaza constant pa e region. E ta resulta den hende herida, perdida di bida humano y un presion grandi riba e sistema di salud,” segun Leonardo Hernandez, Hefe di Unidad di Operacion di Emergencia di PAHO. “Activando medida preventivo pa proteha hende y e infraestructura di cuido medico prome cu un evento di tempo extremo, ta crucial pa reduci su impacto, particularmente riba e comunidadnan vulnerabel,” el a agrega.
Ademas di e daño fisico y di infraestructura cu hopi biaha ta stroba acceso y disponibilidad di servicio esencial, e consecuencianan di salud relaciona cu evento di tempo extremo ta inclui riesgo eleva di malesa transmiti pa awa, manera diarea of colera; malesa transmiti pa sangura, manera dengue y Chikungunya; y malesa respiratorio, entre otro.
Temporada di horcan 2025
NOAA ta predeci un 60% di chens cu e temporada di horcan 2025 lo ta mas activo cu normal. E prediccion ta inclui entre 13 te 19 tormenta nombra (cu biento di 39 miya pa ora of mas). Di esakinan, 6 te 10 por bira horcan (cu biento di 74 miya pa ora of mas), incluyendo 3 te 5 horcan mayor (categoria 3, 4 of 5, cu biento di 111 miya pa ora of mas).
E temporada di horcan 2024 ya a keda recorda como hopi destructivo y a causa un di e perdidanan economico mas grandi registra. E temporada aki tabatin 18 tormenta nombra, entre nan shete tormenta tropical y 11 horcan — di cual cinco tabata horcan mayor. E temporada a mira varios horcan categoria 5, incluyendo Horcan Beryl, cu a forma den juni y a bira e horcan categoria 5 mas tempran hamas registra.
PAHO tambe ta sigui traha hunto cu paisnan pa asegura cu plannan nacional di respuesta na emergencia ta actualisa, y pa fortifica mecanismonan di coordinacion intersectorial na nivel nacional y local, pa por duna un respuesta oportuno y eficaz den caso di alertanan futuro di emergencia.
