Minister di Salud ta reconfirma:
ORANJESTAD (AAN) — Den entrevista cu DIARIO, Minister di Salud, señora Wyatt-Ras, a referi un biaha mas na e lista positivo di remedi cu a wordo restablece pa pueblo, for di dia 1 di Mei ultimo, despues cu na 2022 a wordo kita for di dje.
No obstante, ainda tin pashentnan disgusta cu no ta hayando nan remedinan cubri pa AZV, sino cu nan ta wordo cobra den botica.
E mandatario a menciona cu 129 remedi a wordo poni bek, den tur tipo di forma. El a comenta cu el a tuma nota di un informacion cu a wordo duna, y cu a bruha hopi hende. El a indica cu tin un cantidad di medicina cu a disparce tambe di e boticanan, pasobra nan no ta wordo uza mas, nan ta bieu, pasa di fecha. Ademas, ultimamente ta bin medicinanan nobo, cu ta un cantidad di 92 cu no ta riba e lista. Sinembargo, e 129nan cu ta riba lista, ta esnan hopi esencial pa nos pueblo.
“Tin si, di e medicinanan aki, un cantidad di ocho cu no ta riba e lista pasobra esey ta e conseho cu nos ta haya, cu ta medicinanan cu tin un semehante (generico) riba e lista. Por ehemplo, Paracetamol, cu tin medicinanan mas fuerte cu por haya riba e lista positivo. Door cu e no ta caro tampoco, bo por cumpra nan”, Wyatt-Ras a splica.
Durante cu e lista a wordo introduci tin hopi hende cu a bisa cu tal remedi nan no ta haya mas, y a inventariza nan y gobierno tin un lista pa bay consulta cu e Comision di Gobierno cu tin cu duna advies den esaki. En todo caso, e 129 remedinan a bay bek riba e lista y e minister no ta compronde di con tin hende cu no ta hayando e medicina, por tin diferente factor y mester tin un tiki pasenshi cu esey y dune un tempo tambe.
Ta bay tin pronto, un reunion cu e boticanan pa haya sa cua remedinan y mester bay traha tambe e Ministeriele Beschikking unda cu e medicinanan aki tambe ta bay den e pakete oficial.
“Locual cu nos, como gobierno a haci si, duna pueblo, manera nos a priminti, e medicinanan bek. Un di e medicinanan cu tabata tin hopi discusion riba dje, ta esnan pa drumi, di cual nos por a compronde cu tin hopi hende adicto na dje. Esaki a wordo discuti riba dje y nan ta bay awo riba consulta medico. Kiermen, medicinanan cu no ta riba e lista positivo por wordo receta door di un docter, si e ta haya cu ta necesario pa e pashent. Si no, mester cumpr’e, pasobra manera nos a compronde tin hopi persona adicto na dje, no solamente na Aruba, pero mundialmente”, Minister Wyatt-Ras a indica.
