*Ta reitera su yamada na KPA pa un caso specifico
ORANJESTAD (AAN) — Miguel Gomes, Relacionista Publico di Bureau City Inspector, a declara den entrevista cu DIARIO, cu nan ta haya hopi keho entre bisiñanan den casnan di pueblo, debi na problema di awa di pos, entre otro.
“Mi tin un mensahe pa tur ciudadano di Aruba, na atencion di pueblo! Shonnan, ban cuminza respeta propiedad di otro. Respeta tereno di otro. No invadi tereno cu no ta di bo. P’esey Domein Beheer y Kadaster ta pone penchi. Traha bo cura riba bo penchi, no pasa bo limite!” señor Gomes a expresa.
Gomes a comenta cu tur hende ta paga pa nan vierkante meter y nan grondbelasting. “Asina ta, si bo tin 500 meter cuadra, cera 500 meter cuadra. No cera 520 meter pasobra mañan boso ta haya problema cu otro, legal, huridico pa e cosnan ey”, Gomes a bisa. El a conta cu siman pasa el a scucha un caso lamentable di un señora cu a bay BCI cu a duel’e hopi.
“E señora aki ta un persona grandi, e ta traha, e tin su cas ki ora cu e ta bay traha, ora e bin anochi e bisiña ta tranca su entrada di cas, nan ta tira sushi den su cura, e ta haya baki cu tur sushi cu e bisiña tin, ta tir’e den e señora aki su cas. Kiermen, e ta cana un caminda di Cruz tur siman pa polis, y te dia di awe mi no sa si el a haya solucion p’e. Mi ta spera cu KPA por a logra regla esaki, pasobra esey no por, e cos aki ta pasando di mas. Pues, respeta propiedad di otro, por fabor!” Vocero di BCI a reitera.
Gomes a bisa cu BCI no por pone sancion, pero DIP si, y e ta spera cu DIP por haci esey den e caso aki, pasobra nan ta tereno priva. Den e caso di e señora aki e tereno ta eigendom.
Esaki ta enberdad un caso hopi lamentable y p’esey señor Gomes a mande pa KPA, pasobra e señora ta haya hasta amenaza cu nan ta bay kibra bentana di su cas, y e ta pasando den dolor di cabes, hopi stress, hasta bestia morto e bisiña ta tira dilanti su cas of den su cura. Pero no solamente ta e caso tristo aki, sino cu BCI ta haya pa dia hopi otro caso similar, y ta casonan cu ta fo'i di man di BCI. “Mi ta bolbe haci un yamada na KPA pa yuda den e casonan aki, papia cu e personanan cu ta haciendo e fechorianan aki”, Miguel Gomes, PR di Bureau City Inspector a vocifera.
