Tisa Lasorte di AHATA:
ORANJESTAD (AAN): CEO di Aruba Hotel and Tourism Association (AHATA), Sra. Tisa Lasorte a duna di conoce cu tanto local como bishitante ta mirando un decadencia den e careteranan na Aruba.
Pa hopi tempo ta mirando cu Aruba ta un isla den un industria exitoso di turismo. Ta conoci cu tin placa pasobra Gobierno a papia di un surplus. "Si tin un surplus y si tin placa na Aruba, kico nos ta haciendo pa drecha nos infrastructura, pa drecha nos como un producto?", el a expresa.
Lasorte a sigui bisa cu a bira tempo pa Aruba enfoca mas y pone mas atencion riba drecha e calidad di e pais.
Tin hopi aña ta bezig cu crecemento den volumen di hende cu ta bin, den volumen di vacation rentals, di camber di hotel, etc. Pero loke mester haci awor enbes di crece den volumen ta priorisa e hecho cu mester hisa e calidad di e producto. Esey ta inclui scolnan, educacion, beachnan, careteranan, RWZI, y hopi otro cos na Aruba cu mester drecha, el a bisa, pa Aruba por keda valioso como producto.
