ORANJESTAD (AAN) – Manera ta wordo bisa, hopi biaha den un of otro competencia deportivo ora cu ta cerca di termina, cu nan ta den e recta final, asina nos ta na e momentonan aki pa loke ta cambio di aña.
Mundo ta den e recta final di aña 2021 pa inicia e carera di 2022. Un cambio di aña carga cu expectativa riba e recuperacion economico y financiero mundial, pero tambe den cada hogar.
Tur hende kier scucha noticianan alentador, sinti cu di berdad tin un luz na horizonte, cu e pandemia ta cuminza baha su forza y cu lo no tin otro variantenan mas cu por amenaza e stabilidad na mundo. Mientras tanto, ainda por scucha hende cu no ta kere cu tin pandemia, cu ta insisti cu e ta un asunto politico of comercial, siendo cu dilanti nan nanishi cahanan di morto ta pasa pa Santana, cu e restonan mortal di esnan cu a y ta sigui muri door di covid-19.
Pero tambe tin hopi hende cu a vacuna, pero ta confia demasiado cu si tin e dos dosis, y mas ainda si tin e di tres, tur cos ta cla! Ya nan por sali trankil sin uza tapaboca, no ta haci tanto uso di e hand sanitizer of di habon desinfectante pa man, a baha man riba e protocol di tene cas full limpi, etc., y no ta pone hopi atencion na e hecho cu e virus aki ta comporta su mes asina straño y caprichoso, cu no obstante e vacunanan (1-2 y 3) un persona por bira victima di contagio y por contagia otronan tambe.
Segun informenan cu por sigui den noticieronan internacional tin algun poco pais cu ya casi tabata alcanza e “herd immunity” door di vacunacionnan masal di 1 y 2 dosis, ora cu omicron a drenta den wega, y nan ta haya nan mes den apuro pa aplica e booster. Un pais cu a wordo menciona, pa loke ta America Latina, ta Ecuador.
Y refiriendo na e situacion local, Aruba tin mas cu 84.000 persona vacuna en total, entre e prome y di dos dosis, y awo ohala logra pronto sigui riba e mesun trend aki, cu e booster. Esaki ta un reto pa Aruba su poblacion, un cambio di aña cu e gran mayoria di hende vacuna incluyendo e booster, y un cambio den mentalidad den e segmento cu no a hacie ainda pasobra nan no kier. En todo caso, ban duna e situacion aki e importancia real cu tin, y percura pa Aruba bira un di e paisnan cu mas lihe ta yega na su herd immunity na 2022. E miho regalo cu cada un di nos por haci otro, cu Dios su poder y e bon boluntad di tur ciudadano.
