Pabien pa Fundacion Lanta Papiamento

Pa:  Addonsito Croes

Recien mi a bishita e lansamento di un buki nobo, cu mi ta categorisa como un tesoro unico pa nos idioma Papiamento y p’e historia di Aruba titula: Ata Compa Nanzi atrobe.

Cu e storianan di Compa Nanzi di e autornan Andy Daal y Yvette Ecury cu ilustracion di Nigel Matthew, un buki hopi campeon cu Fundacion Lanta Papiamento (FLP) a produci. E ta un obra picaro pa hoben y adulto.

E bunita di e buki di cuenta ‘ki di Compa Nanzi ta ademas cu e ta den Aruba su ortografia Etimologico y na e otro banda e ortografia Fonologico di Corsou.

E lansamento di e buki na Biblioteca Nacional di Aruba, tabata unico como un elenco di actornan consistiendo di Richard Dabian (Cha Tiger), Madelene Kelly (Shi Maria),  Aida Daems-Flanegien (Narado) y  Onty Lopez (Compa Nanzi) a presenta un obra den cua Compa Nanzi, atrobe, a nek Cha Tiger na un forma gracioso.

Na nomber di FLP, Dr. Joyce Pereira a conta con e idea aki a nace y con a logra, finalmente, pone riba mercado. El a gradici tur instante y persona pa nan apoyo.

Cada persona di e instancianan cu a hunga un rol importante den e producto aki, a ricibi un buki como obsekio. Tambe David Kock Jr. tabatin e chens di presenta su koffie local Kompa Nanzi.

Tabata un anochi unico den cua tur presente a disfruta di e lansamento den un buki di tanto Ata Compa Nanzi atrobe como di Ata Kompa Nanzi atrobe!  Pabien Fundacion Lanta Papiamento. Pa informacion por bishita e pagina riba Facebook di FLP.