Miembro di Parlamento, John Hart:
ORANJESTAD (AAN) – E siman aki lo marca un serie di reunion importante den marco di e Comision Fiho di Asuntonan Husticial, Integracion y Peticionnan, unda lo tin diferente encuentro cu e minister di husticia y su respectivo departamentonan. E reunionnan tin como meta fortalece cooperacion institucional y garantisa un supervision efectivo di e trabounan di ministerio.
Parlamentario di AVP y presidente di e comision, John Hart, a enfatisa cu dialogo regular entre parlamento y ministerio di husticia ta esencial pa e bon funcionamento di estado di derecho y pa e rol constitucional di control cu parlamento tin.
“Como presidente di e comision, mi ta kere cu ta sumamente importante pa e comision mantene un dialogo directo y continuo cu e minister di husticia y su departamentonan, pa asina nos, como miembronan di parlamento, por eherce nos rol di control di forma responsabel y efectivo,” sr. Hart a declara.
Na final di aña pasa, specificamente den december 2025, e comision a reuni pa identifica un serie di tema prioritario pa atende durante aña 2026. Un di e tema principal cu a sali na cla tabata siguridad di trafico, un asunto cu a keda na e centro di atencion despues di diferente incidente serio riba nos camindanan.
“Siguridad di trafico a bira un prioridad urgente. Aña 2026 a cuminsa cu un sesion di pregunta den parlamento cu e minister di husticia, unda ami personalmente a hiba atencion riba e accidente tragico cu a conmociona nos comunidad,” Sr. Hart a indica.
Den e marco di mehora siguridad vial, Parlamento di Aruba recientemente a aproba legislacion importante tocante conduccion irresponsabel (roekeloos rijden), un paso significativo pa fortalece proteccion di tur usuario di trafico y reduci riesgo riba caminda.
Un otro tema cu a resalta, despues di e asunto di siguridad di trafico, ta e necesidad pa un prizon nobo. Den e contexto aki, Parlamento di Aruba a ricibi recientemente un presentacion di UNOPS, hunto cu e team di ministerio di husticia, durante un reunion publico den sala di parlamento, unda a comparti informacion importante tocante e planificacion y e siguiente pasonan pa realisa e proyecto.
Parlamentario Hart a recalca cu Parlamento di Aruba tin un rol central den e funcionamiento di gobernacion y den e proceso di tuma decision riba diferente area di interes publico. Pa e motibo ey, el a expresa su satisfaccion cu e minister di husticia ta mustra disposicion pa mantene transparencia y cooperacion cu parlamento.
“Mi ta aprecia cu e Minister di Husticia ta duna prioridad na comparti informacion y splicacion cu e comision. E tipo di cooperacion ta fundamental pa un gobernacion responsabel y pa garantisa cu decisionnan ta tuma riba base di informacion corecto,” Sr. Hart a añadi.
Durante e simannan venidero, e comision fiho lo concentra riba diferente tema relevante pa e sector di husticia y gobernacion. Entre e puntonan principal riba agenda tin:
Directie Casinowezen y su plannan pa futuro;
Maneho general di Directie Voogdijraad;
Criteria di Ministerio Publico tocante kiebro den cas y auto;
Proyecto di DIMAS pa flexibilisa e proceso di permiso temporal;
Dialogo cu DWJZ tocante e revision di procedimentonan legislativo y e manera con e comision por desempeña un rol mas proactivo den e proceso di creacion di ley.
Fraccion AVP ta reafirma su compromiso pa continua fortalece supervision parlamentario, promove siguridad publico y traha activamente pa garantisa un sistema di husticia eficiente, transparente y responsabel pa tur ciudadano di Aruba.
