Pabien na pueblo di Aruba cu e celebracion di Himno y Bandera!

Parlamentario Marco Berlis (MEP):

ORANJESTAD (AAN):  Luna di maart ta un di e lunanan di mas importante, ya cu den e luna aki Aruba ta celebra su dia Nacional di Himno y Bandera. Un dia cu nos ta conmemora e logro historico ora cu nos libertador Betico Croes a logra introduci na nos pais su propio himno y bandera.

            Betico Croes cu tabata e lider di MEP a logra pa Aruba haya su propio Parlamento, su propio moneda e florin, su propio Contraloria General (Algemene Rekenkamer) y Organo Consultativo (Raad van Advies). Tambe Betico Croes a logra cu nos lenguahe maternal Papiamento wordo reconoci. Betico Croes a dedica henter su bida pa lucha y duna Aruba su Status Aparte. E tabata un homber cu un gran vision y mision; “Aruba no por a sigui mas bao di e capa di Antiyas Hulandes y mester a bira un pais autonomo los for di Antiyas y cu un gobierno propio. Betico Croes su perseverancia a haci cu nos Status Aparte a bira un realidad y nada no tabata por descurash’e.

            E celebracion dia 18 di maart y e luna di maart en general ta uno cu ta promove nos cultura, nos cumindanan crioyo, nos musica tipico y nos artesania local. Sin e esfuerso y determinacion di nos libertador Betico Croes hamas nos lo por a disfruta di esaki. Pesey, ban sali masalmente y sostene e celebracion aki na Plaza Libertador Betico Croes.

            Manera custumber, tin e tentnan yen di nos dushi cumindanan crioyo, artesania local, t-shirts y otro cosnan bunita pa cumpra sin falta e dessertnan dushi pa come y bebe. Esaki compaña pa musica tipico y danza continuo di nos mucha-, hoben- y adultonan local. Hunto nan ta deleita e publico presente y sigur esnan cu lo sigui e eventonan via di e medionan social y television. Sin duda Aruba lo sa con pa celebra e luna aki un biaha mas dianan 17 y 18 di maart.

            Desde akinan un caluroso pabien Aruba di nos dia nacional di Himno y Bandera, un fabuloso 18 di maart! Gosa conscientemente y laga nos haci esaki di un forma sigur. Si bo bebe, no stuur!