Pa temporada di Horcan ta revisa tur plan den sector turistico tambe

ORANJESTAD (AAN): Siman pasa oficialmente e Temporada di Horcan 2021 a cuminza, sinembargo ya desde 15 di Mei a cuminza pone un ‘watch’ pa e temporada.

   Rino Hermans di Rampenbureau Aruba, a indica cu riba e isla aki, ta varios plan a wordo traha pa 2021.  Segun Hermans, e.o. tin plan kedando cla pa scolnan, y tambe diferente departamento di Gobierno.

   National Hurricane Center na Miami a pidi tur hende pa laga tur hende prepara den e piek di e temporada cu ta Augustus-September, esta cu unavez cu bo a train bo plan, bo a keda prepara tambe si bo topa cualkier eventualidad.

   Pa e sector hotelero, AHATA ta lidera e parti pa prepara y train esnan cu ta laborando na Hotel pa cu temporada di Horcan.  Lo bay tin un sesion di 2 dia (total di 16 ora), pa asina revisa full e plan di e sector turistico cu hopi biaha ta esnan cu ta wordo inunda y ta sufri mas daño.

   A haci palabracionnan caba cu e sector hotelero, y awor ta bay pa e sesion maratonico pa update y hisa e nivel di capacidad di henter sector turistico.  Di e forma aki ta recapacita e sector pa asina por recubri mas rapido di cualkier tormenta cu afecta Aruba.

  Pa por cubri tur e otro lugarnan cu ta depende di turismo (incluyendo Airbnb) cu ta plama tur rond, pesey Rampenbureau tin e Digital Disaster Management na Aruba (RAVEN) cu ta inclui informacion unda e localidadnan ta pa caso di emergencia.

   Awor tin nan poni riba mapa, pues hopi di nan no ta scondi mas.  Aunke hopi no ta miembro di AHATA, tin pensa di organiza algo pa e sector ey tambe por participa den e plan.