Director di SETAR NV, Roland Croes:
ORANJESTAD (AAN) – Den conferencia di prensa, den cual Minister Dangui Oduber a duna e noticia importante cu Ministerio di Salud, SETAR, SVb y AZV, a firma un Acuerdo di Intencion (MOU), den e cuadro di innovacion y automatizacion di henter e sector medico na Aruba, tanto Ir. Edwin Jacobs, Director di SVb-AZV y Ing. Roland Croes, director di SETAR, a hiba palabra.
Ing. Croes a expresa cu SETAR ta hopi contento cu a haya e oportunidad aki, y a splica con e compania ta mira esaki tambe. El a bisa cu tempo cu SETAR a wordo acerca, den tempo di pandemia tocante e health app, gobierno tabata analiza diferente opcion tambe pafo di Aruba, pero na final gobierno a scoge un compania cu ta cerca na Aruba mes, y cu tin contacto cu directo cu gobierno y cu tur hende envolvi. Tabata tin hopi partido envolvi e tempo ey y SETAR a haya e opdracht na April y na Juli mes, mester tabata cla ora turistanan a bolbe Aruba.
Croes a splica cu esaki tabata un gran reto pa e compania, pasobra aunke e tin hopi experiencia den traha app, esaki tabata na otro manera ya cu mester a trahe rapidamente y instala yen di tecnologia nobo cu por a uza y cu a uza tambe, pasobra rapidamente mester a pasa di control manual pa loke ta e testnan di Covid-19 y ken tabata tin'e, te cu finalmente mester a introduci e forma digital, locual a tuma hopi esfuerzo di e tecniconan y di e empleadonan di Departamento di Salud Publico. Nan logra un sistema cu tin internacionalmente.
Di e manera cu nan a haci esaki tin pensa di traha riba e plataforma (Innovation Partnership) pa digitaliza henter sector di cuido pa cual a firma e MoU, aworaki, y cada cuater pa ocho luna SETAR lo duna resultado.
Director di SETAR NV a expresa cu pa e compania ta un honor pa participa den e cooperacion aki, y e ta sigur cu na final lo logra algo cu ta e “next level” den tecnologia vooral pa e comunidad y experiencia pa su clientenan.
