Pa prome biaha Marina Real a train hunto cu e avion sin piloto MQ-9 Reaper

WILLEMSTAD: Siman pasa un training hopi peculiar a ser teni na isla di Curaçao, unda cu pa prome biaha a haci uso den esaki di e Avion sin Piloto,

esta e MQ-9 Reaper di Forza Aereo Real, pa asina simula e capacidad di combate for di aire.

   E prome training aki di e MQ-9 y e Mariniernan na Curaçao, a wordo yama ‘Caribbean Pirates’.  Nan a haci uso di un avion cu ta bula via remote control.  Algun hende lo kier usa e palabra ‘drone’ of ‘unmanned aerial vehicle’, pero aki tin hopi aspecto diferente.  Pasobra aunke enberdad e avion ta sin piloto abordo, toch e control di stuur mester ta den man di un piloto cu experiencia!  Pesey e ta wordo yama ‘Remotely Piloted Aircraft System (RPAS)’.

   E avion tin su mesun radar, y medio pa comunicacion via satelite.  Danki na esaki, por pilotea e avion aki tur caminda rond mundo.  Danki na e conexion di satelite tambe, ta posible pa analistanan militar por check tur imagen mesora, of manda esaki pa e militarnan cu ta na tera den e area.  Bao di e avion tin algun haak tambe, sea pa extra tanki di combustible, of mas aparato di observacion, of hasta sistema di arma.

   E avion MQ-9 ta lanta vuelo casi sin sonido for di e base di FOL (Forward Operating Location) cu tin na Aeropuerto di Hato na Curaçao.  Algun kilometer mas leu tin algun marinier, kendenan tin di dirigi e avion invisible bulando na bastante haltura, na un blanco specifico.  Prome biaha e dirigentenan di sosten aereo a train cu e 306 Squadron y nan Reaper.

   E training aki di JTAC (Joint Terminal Attack Controllers) di Cuerpo di Marinier y 306 Squadron, a pone cu pa prome biaha nan dos a coopera.  E training ademas tabata unico, como cu tur cinco oficial di JTAC di e Marine Combat Group (MCG) a bin hunto.

   Hulanda a escoge Curaçao pa staciona e avion aki, pasobra e situacion di tempo ta mihor compara cu na Tera Frieu.  Ademas tambe e cantidad di avionnan bulando den espacio aereo di Curaçao ta mucho menos compara cu e cielo hopi congestiona cu vuelonan riba Hulanda.  Asina nan por haci nan prueba y evaluacion mas rapido y keda cla liher.