ATIA a contribui na metodo di trabao di profesionalnan den salud mental

Anto na idioma Papiamento

ORANJESTAD (AAN): Tabata Diaranzon cu Asociacion ATIA a brinda e oportunidad na Orthopedagogisch Centrum (OC) y Family Justice Center (FJC) pa organiza un seminario pa professional nan den area di psichiatria y psicologia.

   Despues di e seminario aki, tur profesional lo tin e posibilidad di haci test cu nan clientenan den nos mesun idioma papiamento. Esaki lo contribui na un manera mas uniforme di trabao y lo haci e trabao den area di salud mental mas accesible.

   Den cuadro di e evento, Aruba lo haya bishita di dos profesional internacional, esta Sr. David Vinker (psychiater) for di Hulanda y Micha van de Vorst (psicologo) cu ta traha actualmente na Curacao. Conhuntamente nan a traduci diferente material di test na Papiamento y a logra cu esakinan ta worde acredita. Esaki ta duna e oportunidad pa pasa e material over na tur profesional di Aruba cu ta traha cu e testnan aki.

   Te awor na Aruba ta usa testnan na Ingles y Hulandes, cual nan ta traduci verbalmente na Papiamento. Den practica esaki ta haci cu palabranan ta worde cambia of usa diferente, cual ta haci e manera di test inconsistente. Cu e testnan na Papiamento tin un solucion na caminda.

   Durante e dia di e seminario a duna atencion na e importancia di haci test den idioma materno y tambe e sciencia tras di esaki. Tambe a tuma tempo pa pasa door di e testnan y train esakinan cu otro. A participa total un grupo di 30 profesional, consistiendo di psicologonan y psychiaters.

   Orthopedagogisch Centrum y Family Justice Center ta wak e desaroyo aki importante pa Aruba, mirando cu e ta mehora servicio na cliente y tambe e efectividad di trabao. E ta un paso chikito, pero un paso importante. ATIA a haya e peticion pa contribui cu e facilidad pa duna e seminario y a haci esaki gustosamente, mirando e importancia di e topico, especialmente despues di e pandemia.