Pa prome biaha FPNA ta organiza un curso pa monitor rifnan di coral

ORANJESTAD (AAN): Diaranzon mainta na Surfside Marina a tuma lugar un conferencia organiza pa Fundacion Parke Nacional Aruba (FPNA),

relaciona cu e prome curso cu a wordo organiza, pa monitor rif di coral e siman aki, hunto cu facilitadornan – biologonan marino Tadzio Bervoets di Dutch Caribbean Nature Alliance (DCNA) y Roxanne-Liana Francisca di STINAPA Boneiro.

Durante e conferencia di prensa, Marine Park Manager interino Sietske van der Wal a splica cu e Cursistanan cu ta participa ta representantenan di FPNA, JADS, Scubble Bubbles, Caribbean Lionfish Alliance (CLA), Aqua Windies y Directie Natuur & Milieu (DNM).

Durante e curso di cuatro dia e cursistanan – tur divers certifica – lo wordo entrena pa colecta data siguiendo standardnan y practica pa monitor rifnan di coral di Global Coral Reef Monitoring Network (GCRMN) y di Atlantic and Gulf Rapid Reef Assessment (AGRRA). Segun van der Wal, banda di wordo entrena den e criteria pa monitor, tecnica y protocol, cursistanan lo wordo entrena tambe pa identifica pisca, coral, invertebrate(lobster, calco), alga, malesa di coral, y especienan invasivo – cu ta crucial pa monitor e bida di e rifnan di coral. 

E Marine Park manager interino a sigui bisa cu rif di coral ta un eco sistema cu posibelmente tin e biodiversidad mas halto compara cu cualkier otro eco sistema na mundo. Banda di ta increiblemente bunita, varia, y ta anfitrion di un variedad asombroso di bida marino, rif di coral ta esencial pa e economia di Aruba. Rif di coral ta proteha nos costa di mal tempo y ta un zona di cria y hogar pa diferente especie di importancia vital pa pesca.”Rif di coral y su piscanan unico ta proveedor di Aruba su playanan bunita di santo blanco cu turista di tur parti di mundo ta bin disfruta”, segun van der Wal.

 Sinembargo, rif di coral y su habitantenan ta wordo menaza pa desaroyonan na costa, recreacion marino y na costa, actividadnan maritimo, y polucion di tera, aire y lama, y otro impactonan.

Van der Wal a indica cu e ta entusiasma pa porfin por cuminza colecta data na un manera mas structural. “FPNA ta maneha cuatro Area Marino Proteha cu colectivamente ta wordo yama Parke Marino Aruba”. Nos ta e unico pais den Reino cu no ta structuralmente monitor e bida di e rifnan di coral ainda y cu e curso aki nos ta haya e habilidad pa haci esaki nos mes, segun van der Wal.

El a sigui bisa cu despues di e curso aki, FPNA – hunto cu e aliadonan – lo inspecciona e rifnan di coral cada dos aña na ubicacionnan representativo y asina por determina e estado di Aruba su rifnan, compara data despues di tempo y adapta maneho respectivamente. Data lo wordo comparti cu entre otro DCNA y GCRMN pa por sigui tendencianan na nivel nacional, den Reino y regional. E data colecta durante e inspeccionnan lo wordo incorpora den e maneho di Parke Marino Aruba.

“FPNA ta aprecia y ta agradecido na tur e facilitador  y participantenan pa nan sosten pa hasi e curso aki posibel y uno exitoso – sea den forma financiero, di equipo y transporte, of door di dedica tempo y esfuerzo, segun e Marine Park Manager interino .