Desplegando un carera masha exitoso:
ORANJESTAD (AAN) – DIARIO a realiza un entrevista extenso cu e dama Arubiano Lourdes Bramble, cu tin un trayectoria di 28 aña largo y masha bunita na e Municipio di Haarlemmermeer,
den e ciudad di Hoofddorp, como Trahador Social, na Stichting Meerwaarde yudando hendenan vulnerable.
Lourdes a baha cu pension for di e Stichting, na unda su coleganan tur a produci bunita videonan tocante e trabaonan cu a desplega, como despedida, locual a touch su curazon hopi.
Tambe e ta parti di e staff di Arubahuis, unda tambe tin un bunita experiencia pa conta nos.
Lourdes a relata na DIARIO un parti di su bida na Hulanda, unda banda di ta un gran profesional y activo den duna ayudo social, tambe ta esposa y mama.
“Mi a nace na Aruba, mi tata cu mi mama ta puro Arubiano Indiannan di Santa Cruz y Pos Chikito. Mi a bay Maria College prome, despues mi a bay Colegio Arubano y na 1978 mi a bin Hulanda pa biba y studia. Na comienzo na Hulanda mi a inicia cu estudio di Trahador Social y mi a bin experiencia cu e Hulandes cu nos ta haya na Aruba na scol, no ta suficiente pa sigui akinan un estudio avanza.
Pues, na cuminzamento, naturalmente mi tabata tin hopi pregunta cu e Hulandes y mi a keda traha duro, mi a zet door pasobra a haya importante cu bin Hulanda ta habri asina tanto oportunidad pa bo studia, cu mi a haci uso di e oportunidad ey”, Lourdes a relata.
Lourdes a haci un opleiding di Trahador Social y despues el a sigui un estudio Social Pedagogico, cu a dune acceso pa e bay traha cu hopi hende, mas tanto personanan vulnerable.
“Mi a traha 28 aña na Stichting Meerwaarde, un organizacion cu tin como meta traha na bienestar di hendenan vulnerable, na Hofddorp, y mi a traha na Aruba Huis.
For di 1993 mi a traha na e municipio Haarlemmermeer, y mi tabata staciona na e ciudad di Hoofddorp. Mi funcion tabata un lider di proyecto. Den e 28 añanan cu mi a traha akinan mi a organiza cu exito como 43 proyecto. Hopi trayecto pa pone hendenan cu no por a sigui un opleiding, cu no por a haya un diploma y no por a traha, logra esaki. Apart di e funcion di lider di proyecto mi tabata un coordinador tambe di un Centro. Den e Centro aki, tin entre 275 pa 300 hende, habitantenan vulnerable, ta bin sigui un curso, un charla, un tayer di trabao, un estudio. Nos tin hopi cursonan eynan, na Hulandes, pasobra hendenan vulnerable ta entre otro esnan cu no por lesa ni skirbi Hulandes of tin otronan cu no por papia den Hulandes. Den e Centro aki alomenos 85 hende di nacionalidad cu ta bin haci algo cerca mi. Mi ta coordinador, pues mi tin un team cu ta traha bao di mi, y ta yuda mi pa nos por haci di e Centro aki, un exito enorme”, Lourdes Bramble a relata.
Apart di e trabao aki, Lourdes a yega di traha na Alkmaar y den Helder, prome cu el a bay traha na Hofddorp. Na Alkmaar, unda e ta biba, el a traha na Sociale Dienst y Arbeidsbureau, y na Bureau Trajectbegeleiding, na Den Haag na Arubahuis.
Mas tocante Lourdes Bramble DIARIO lo publica den mas articulo.
