ORANJESTAD (AAN): Durante e reunion den Parlamento pa trata e tema di Presupuesto 2021, Prome Minister Evelyn Wever-Croes a hiba palabra y el a laga cu el a haya 58 pregunta cual a purba di contesta nan.
Den nan prome reunion di e parlamento nobo, el a remarca cu ta hopi importante pa principalmente, e parlamentarionan nobo siña e reglanan ya cu ta iritante pa mira parlamentarionan cu no ta tuma tempo pa studia e reglanan y despues di ta daña e ambiente di e reunion y ta pone sinti cu otro hende no a haci e cosnan bon y ta nan mes a haci fout.
Wever-Croes a lamenta tambe cu no a mira ningun parlamentario di AVP den sala. Nan tabata tey si pa haci drama, pa haci fastioso pero nan no tabata tey pa scucha e berdad, cual ta uno doloroso ocasiona door di nan mes.
El a bisa cu e no por keda sin menciona algo di e hecho cu tin pa prome biaha den historia di Aruba tin un parlamentario deteni den prison. Esaki ta algo cu e ta haya cu Parlamento mester para keto na dje y condena tur dia.
"E ta algo sumamente lamentabel, ta algo sumamente bergonzoso", a expresa. E ta desea pa esaki cambia y e unico manera pa esaki cambia ta si tur dia ta keda traha riba dje pa haci mira cu ta bin un cambio den politica pa libra e futuro generacionnan di berguenzanan asina, Wever-Croes a manifesta.
