ORANJESTAD (AAN): Diasabra anochi trempan pa 6:45 pm, Rescue & Coordination Center di Guardacosta di Caribe Hulandes a ricibi peticion di Polis na Bonaire,
pa presta asistencia den un accident cu a socede na Boca Slagbaai, cu ta keda na banda noordwest di e isla.
Boca Slagbaai ta un lugar popular unda hopi hende ta practica e asina yama ‘Cliff Jumping’ for di barancanan pa cay den lama.
Diasabra atardi un hoben di 18 aña di edad a bay bula for di e barancanan aki pa lama, pero envez di esey el a sali cay y su cabez a dal contra e barancanan.
Esnan cu a mira esaki socede a yama tanto Polis y Ambulans. Pero e unidad di Ambulans na Bonaire no por a yega na e lugar d accident. Pesey a pidi yudanza di e Helicopter di Guardacosta pa haci un evacuacion meidco.
E helicopter si a hisa e hoben for di eybao, y a bay rumbo pa Flamingo International Airport unda un Ambulans tabata sperando riba nan, pa asina transporta e victima pa Hospital San Francisco.
