ORANJESTAD (AAN): Tabata riba e di dos siman di December, cu habitantenan di un caya di Palm Beach a informa DIARIO di e situacion malisimo cu nan caya ta. Esaki tabata pata-pata di buraco yena cu plas di awacero cu a keda yena den nan.
E ta no solamente un problema pa chauffeurnan, pero e hecho cu tin hopi peaton ta usa e caminda aki pa nan cana
bay traha na Hotelnan. Y pa bo pasa den e lodo aki, ta uno fastioso pa un trahador cu tin di bay presenta na forma corecto y representable pa atende turistanan.
Aunke a dura un tiki, toch DOW a haci su best pa yuda e ciudadanonan aki. Y awe via di DIARIO nan ta manda palabra di agradecimento pa e yudanza cu a ser brinda na e habitantenan aki.
E caminda a haya un capa di granit cu por lo pronto lo yuda nan pasa dianan di fiesta cu menos dolor di cabez, y nan invitadonan por pasa bishita nan sin ningun obstaculo mahos mas dilanti cas.
