ORANJESTAD (AAN) – Un tema hopi popular den e pueblo di Aruba ta e situacion di e werksternan di SKOA, segun palabranan di Minister di Enseñanza Endy Croes, den conferencia di prensa.
Tocante e topico aki e mandatario a duna di conoce, cu nan a logra Diabierna ultimo, den reunion di Conseho di Minister, pa yega na un “ministerraad besluit” pa forma, pa medio di un MB, un comision y esaki a wordo aproba.
“Diaranzon awo nos ta bay tin nos prome reunion cu e comision aki, pa duna e direccion tambe y pidi pa den trinta dia, bin cu e consehonan y solucionnan concreto moviendo padilanti.
“ Pa forma e comision aki, nos mes a papia cu e director di Departamento di Finanzas pa e, of ta apunta un persona; nos a papia cu director di DRH, pa e, of e ta apunta un persona; nos a papia cu e director di DWJZ tambe, pa su mes of un persona cu e ta apunta y nos a papia cu CAD pa nan tambe lo ta participe den e comision aki.
“ Nos a reuni cu SKOA y nos a propone nan, pa nos tin un resultado y un bon ‘drag black’, pa nan tambe apunta un experto den e comision aki. Na a bay di acuerdo, pues nan tambe ta bay apunta nan persona y e minister encarga lo apunta dos persona: un register accountant y un hurista. Y basa riba e comision aki cu aworaki tin un decision mediante un MB, cu ta den funcion, lo bin den 30 dia, ohala, y si e dura un poco mas nos lo bisa esaki na caminda segun e proceso aki ta cana, pero pa asina nos por haya e recomendacionnan final, pa di berdad soluciona e problema aki na un manera structural bayendo dilanti. Tin dos punto di interes: 1. Con lo mester sigui paga e werksternan aki, nan tabata tin un discusion legal riba dje, si ta via gastonan di explotacion, etc., y 2. Cu tin 5.2 (of .4) miyon cu, como e stichting no a ricibi e placa mas cu nan tabata ricibi tur luna, for di Financien, pa asina nan por paga e premienan na belasting, a crea un suma cu mester tin claridad tambe riba dje”, e mandatario a señala.
El a reitera cu e comision aki ta ‘in place’ y su ministerio ta trahando bay padilanti, pa soluciona e problemanan na un manera structural y sostenible”, e mandatario a indica.
OAA DEN TAPARA:
Otro asunto cu no a soluciona ainda, pero cu ta pendiente ta “OAA” (Openbare Avondleergangen Aruba), y Minister Endy Croes ta bezig ta hayando conseho e siman aki, tanto di Direccion di Enseñanza como di Inspectie, y atravez di e consehonan aki, nan lo reuni despues cu OAA, unda lo pone e direccion pa un solucion structural tambe.
Minister Endy Croes ta kere cu pa otro siman of maximo dos siman (sin mara su mes na tempo), e lo anuncia kico ta e solucion y e direccion pa cu OAA y asina pone esaki tambe tras di mesa.
