Spellcheck pa skirbi Papiamento ta e gran ausente pa basta dia - *Parti importante di e identidad Arubano ta na peliger grandi - *Gabinete Wever-Croes 2 a hereda un encargo cu Lampe no a termina
ORANJESTAD(AAN)—Defensa di Papiamento, ta uno di e tareanan grandi cu mundo politico tin cu Aruba.
Defensa di Papiamento, tabata e motibo di existencia di DIARIO cu a entrega Aruba un vehiculo pa proteha y defende e idioma materno di e Arubiano como parti total di e identidad Arubano.
Uno di e factornan cu sigur ta distingui e Arubiano, ta Papiamento cu ta sostene e cultura, historia y raiznan propio di Aruba den e presencia di Reino Hulandes den Caribe.
Papiamento di Aruba ta diferente for di Papiamentu di Curaçao y Bonaire. For di momento cu e Arubiano expresa su mes, su “Papiamento”, su expresion ta mustra mundo cu ta un Arubiano ta presente.
E vocabulario Arubano ta directamente mara na e historia di e pais Aruba, cu ta diferente for di historia di tur otro isla den Caribe.
E pronunciacion, entonacion y tur loke ta parti bibo di un idioma, ta distingui e Arubiano entre otro nacionnan.
Defensa di e idioma Papiamento, tabata motibo di nacemento di DIARIO y por wordo considera como e aporte mas grandi cu fundador di DIARIO, Jossy Mehsen Mansur, a laga atras na su pais cu na momento di nacemento di DIARIO, tabata lucha pa bira pais autonomo den Reino.
E derecho riba autonomia cu Aruba a comberti den su lucha, sigur ta wordo sostene pa e idioma di Aruba, cu ta na peliger grandi for di momento cu a bay trata na yega na un compromiso cu otro islanan di Antia pa loke ta trata idioma.
Cu esaki tabata imposibel, ta algo cu historia di Aruba ta demostra y cu Jossy Mansur semper a demostra den su obranan cu mester a duna Aruba un vocabulario Arubano cu no ta igual na e vocabulario di otro islanan Hulandes cu conoce Papiamentu.
Esaki ta nifica, cu den Reino Hulandes, na e momentonan aki Papiamento di e Arubiano ta na peliger pasobra no tin un spell check, un forma cu e persona cu ta skirbi Papiamento (y no Papiamentu) ta wordo guia.
Rudy Lampe como Ministro di Enseñansa di Aruba, a introduci un spell check a base di loke ta wordo considera e ortografia oficial di Aruba, pero cu cientificamente no ta corecto y directamente ta afecta e naturalesa Arubano cu ta distingui Papiamento di Papiamentu.
Rudy Lampe a introduci un spellcheck, cu un forma di instalacion den cual e idioma Basco mester a wordo uza riba e sistemanan di computer.
Cu entrada di versionnan nobo di sistema cu ta regla vocabulario pa spellcheck, pa basta tempo no ta posibel mas pa uza spellcheck, cu e resultado, cu mas y mas eror ta bini dilanti den Papiamento, cu ta na peliger serio.
E velocidad di computer ta exigi spellcheck pa evita eror, hasta pa expertonan cu por comete eror tipografico.
Na mes momento, factornan mundial cu ta afecta tur cultura y idioma na mundo, ta pone Papiamento mas na peliger .
Gabinete Wever-Croes 2 a hereda e pakete di Papiamento, cu Rudy Lamper a laga atras.
Na momento cu Aruba ta subi e caminda di un futuro nobo, reconstruccion di e pais mester inclui un Papiamento fuerte cu Aruba mester como nacion cu a lucha pa hancra su propio identidad den su Status Aparte.
