Minister Endy Croes satisfecho y gradici: - ORANJESTAD (AAN)— E conferencia di prensa di gobierno pa habri siman Dialuna, tabata na encargo di Minister Endy Croes, titular di Enseñanza y Deporte.
E mandatario a cuminza cu un update riba tereno di enseñanza, pa informa pueblo con esaki ta bayendo y tambe a duna informacion encuanto tereno deportivo, unda el a profundiza un poco mas.
ENSEÑANZA: E prome punto cu e dignatario a referi na dje ta scol EPB, bayendo bek riba e tema cu el a toca den un conferencia di prensa anterior den cual e mandatario a bisa cu e ta buscando solucion al respecto.
“Y manera mi a splica anteriormente, despues di un conseho positivo di Departamento di Inspeccion di Enseñanza, nos mes a reuni cu EPB y nos ta hopi gradici cu nos a hiba un bon reunion cu nan, mientras tanto cu a ubica e fondonan necesario pa por surpasa e oranan extra di 4% cu tin poni, cu algo mas, y asina permiti EPB pa nan por habri dos klas pa 33 alumno cu no por a cuminza scol na September, pa e motibo ey.”
“Entre EPB San Nicolas y EPB Playa, desde awe nos a wordo confirma cu EPB lo a tuma contacto, durante dialuna, cu tur e 33 alumnonan y/of nan mayornan y tambe a stipula e fecha y e dia, e siman aki ( si no ta mañan ta otro mañan) cu e dos klasnan lo wordo habri, y e 33 alumnonan aki (leerplicht bao 16 aña) por cuminza tambe bay scol e siman aki”, Minister Endy Croes a informa.
E dignatario a agrega cu e ta contento, y kier a gradici no solamente pa e decision cu e minister cu ta carga responsabilidad den esaki a tuma, pero tambe e departamentonan meymey cu a yude yega na e consehonan corecto, y alavez e boluntad di tur e stakeholdernan, den e caso aki EPB, e maestronan cu mester bay traha un poco mas ora extra; pero a logra esaki na bienestar di e alumnonan aki, y e problema aki tambe a wordo resolvi, Minister Endy Croes a subraya.
