Minister Wyatt Ras:
ORANJESTAD (AAN): Gobierno di Aruba a anuncia un serie di aumento importante den diferente forma di asistencia social cu lo beneficia famia y personanan vulnerabel den comunidad. E medidanan, anuncia diabierna durante un conferencia di prensa pa Minister di Asuntonan Social Mervin Wyatt Ras, hunto cu Prome Minister Mike Eman, ta forma parti di e compromiso di Gabinete AVP-Futuro pa sigui fortalece e red di proteccion social y mehora e poder adkisitivo di e grupo cu mas mester sosten.
Entre e medidanan anuncia ta un aumento di AWG 150 den e bijstand basico, cu ta subi di AWG 450 pa AWG 600 pa luna. Tambe lo tin un aumento di AWG 300 den e maandelijkse schooltoeslag, cu lo subi te AWG 1.100 pa luna pa famianan cu yiu di 3 te 24 aña cu ta sigui enseñansa full-time. Ademas, e contribucion pa schoolgeld lo aumenta di AWG 120 pa AWG 250 pa cada mucha, mientras cu e aporte pa compra di articulonan escolar lo subi di AWG 250 pa AWG 300 pa mucha, cu un maximo di AWG 1.000 pa famia.
Segun Minister Wyatt Ras, e aumentonan ta resultado di vision di gobierno cu ta pone dignidad humano, igualdad di oportunidad y inclusion social como prioridad.
"Nos kier cu tur mucha por tin e oportunidad pa sigui su enseñansa, sin cu situacion financiero di cas bira un obstaculo. Pa hopi mayor, gasto di uniform, material escolar, transporte y schoolgeld ta representa un peso hopi grandi. Cu e sosten adicional aki nos ta yuda e famianan vulnerabel cubri e gastonan esensial ey."
Minister a splica cu e sosten nobo ta duna mayornan mas espacio financiero pa atende necesidadnan basico di nan famia, particularmente den un momento unda costo di bida ta sigui eherce presion riba e presupuesto den hopi cas.
Ademas di e aumentonan anuncia awe, Minister Wyatt Ras a recorda cu recientemente Gobierno tambe a aumenta e gehandicaptenuitkering cu AWG 100 pa luna y cu actualmente ta trahando riba diferente reforma legal pa modernisa e sistema di sosten social. Entre esakinan tin revision di e Ley di Bijstand, e Ley di Gehandicaptenuitkering y un marco legal nobo pa brinda sosten structural na famianan cu yiu cu limitacionnan, cu ta actualmente den e fase di revision na Raad van Advies.
E medidanan ta forma parti di un vision mas amplio pa fortalece comunidad y amplia oportunidadnan pa tur ciudadano.
"Cada famia cu nos logra yuda ta representa un inversion den nos comunidad. Ora un persona no por cubri su necesidadnan basico, e impacto no ta limita na e hogar solamente; e repercusionnan ta sintie den henter comunidad. P'esey nos ta sigui invirti den un sistema di sosten social cu ta brinda dignidad, calidad di bida y igualdad di oportunidad."
A gradici Ministerio di Asuntonan Social, e funcionarionan publico, colega y tur colaborador cu, apesar di e periodo di vakantie, a logra prepara y implementa e medidanan aki den tempo record.
Cu e aumentonan aki, Gabinete AVP- Futuro ta sigui construi un sistema di sosten social mas fuerte y moderno, cu ta pone bienestar di ciudadano na centro di maneho y cu ta busca crea un Aruba caminda tur persona tin e oportunidad di biba cu dignidad, pa desaroya su potencial y participa plenamente den sociedad.
