*Solamente 9% di centro di ciudad tin vegetacion - ORANJESTAD (AAN): Gisbert Boekhoudt, Director di Departamento di Medio Ambiente (DNM) a indica cu den e proyecto di renobacion di Oranjestad, naturalesa tambe ta haya su atencion.
"Naturalesa ta parti di nos bida y ta genera bida. Pa nos haya un Oranjestad nobo y viviente manera a wordo bisa caba, e naturalesa tin su balor, y esey mi ta bay purba di demostra", a expresa.
DIP a haci e planificacion pa organisacion pa organisa con ta uza e terenonan y diferente funcion cu ta tradicional caba manera e funcion di gobierno, educacion, comercio cu tur ta na Playa.
E funcion di naturalesa hopi biaha ta cerca Arikok, pero Oranjestad tambe tin su naturalesa. Door di analisisnan a ripara cu solamente 9 % di centro di ciudad tin vegetacion.
A agrega cu e 'haven front' tin solamente 2 % y e area di transeccion tin solamente 7 %.
Segun Boekhoudt, pa por urbanisa pa bay den futuro y pa percura cu ta mas resiliente, no solamente pa e clima cu ta bay cambia, sea mas awa di yobida of mas secura, temperatura mas halto, olanan tropical of hasta horcan, cu naturalesa por absorba cierto parti di esaki.
Dilanti di Oranjestad tin un rif unda tin un mangrove solitario cu antes tabata tin yen di mangrove eynan. Esaki ta un proteccion di Oranjestad riba su mes y esey ta un balor ecologico, a remarca.
El a sigui bisa cu e parti di yena naturalesa of duna naturalesa mas atencion, tradicionalmente tin e naturalesa horizontal. Pero den diferente pintura, potret y ehempelnan di otro pais, por wak cu naturalesa tambe ta bira parti di e urbanisacion, parti di un edificio cu ta bay halto.
Si den Oranjestad antes comercio tabata abao y ta boga pa vivienda bin riba dje naturalesa tambe mester bira parti di dje, riba dje, banda di dje pa fortalece e bienestar di hende, Boekhoudt a señala.
"Naturalesa ta trece un color den e ciudad (...) E ta trece hopi hende manera ora nan busca un manera pa relax, hopi ta bay lama, hopi ta bay Arikok den naturalesa. Si bo trece naturalesa den ciudad, bo ta crea trankilidad", Gisbert Boekhoudt a remarca.
Banda di e trankilidad e ta duna un parti di embeyecimento, no solamente cu matanan di afo pero local, poniendo e parti autentico di Aruba den dje, a bisa.
Un otro parti cu naturalesa tin ta loke "nos ta tuma sin nos sa cu nos ta tume". Cu no ta bin di un mashin, ni di otro hende, pero e ta bin di mata. Naturalesa ta absorba tambe e gasnan toxico cu ta bay den aire door di e circulacion di autonan den ciudad.
"Naturalesa tin su balor y esaki nos por ripara ora nos bay den hotel, cu ora bo kier e vista di lama, of e bista di e hardin bo tin cu paga p'e", a enfatisa.
