Pa final di 2021 ta premira cu Aruba lo surpasa 100 mil turista crusero

ORANJESTAD (AAN)—Minister di Salud y Turismo, Dangui Oduber, a señala den conferencia di prensa, cu e situacion na Aruba  tambe ta permiti cu turismo a 'pick up' na un manera acelera bek,

           pero na dado momento na luna di Augustus, e isla a confronta cu e variante delta.

            E lunanan prome, e dignatario a acentua, esta Juni y Juli tabata hopi bon pa Aruba su turismo y su economia.

            “Pero nos por mira cu nos ta recuperando conforme e proyeccionnan cu  nos a haci den comienzo di aña, y nos ta excediendo esakinan. Kiermen cu nos ta bayendo miho cu nos mes a proyecta na comienzo di aña. Y sigur esaki ta danki na e esfuerzo di Ministerio di Turismo y tur nos partners ATA, Triple A, AHATA y APA, cu ta haciendo esfuerzonan pa nos percura pa recupera nos turismo manera cu e tabata den pasado.

            Den Luna di September nos a proyecta mas bishitante, pero debi cu nos a haya varios cancelacion di diferente grupo, nos a recupera 82% di nos turismo, cual sigur ta bon, pa ta den aña di pandemia pa Aruba, en comparacion di tur  nos competidornan nos ta un di e paisnan den Caribe cu ta recuperando miho. Nos mercado principal cu ta e mercado Mericano, si ta registrando cifranan hopi positivo.

            Den Luna di September nos a recupera 91% caba di nos turismo, en comparacion cu September 2019. Y nos tin cu bisa cu aña 2019 tabata uno hopi exitoso den tur sentido di palabra pa nos turismo. Kiermen, ora nos ta recupera 80-90% den un aña di pandemia, nos tin cu considera esaki hopi exitoso, pasobra e pandemia keto bay tey presente, y no obstante e retonan nos a percura pa nos turismo recupera na un forma hopi acelera, cu na final di dia ta yuda nos economia, crea cuponan di trabao y tambe entradanan cu gobierno mester di dje, pa nos como pais Aruba, para riba nos propio pianan”, Minister di Salud y Turismo, Dangui Oduber a subraya.

            El a agrega cu no solamente e turismo “stay over” ta recuperando pero tambe e turismo crusero. E turismo “stay over” a recupera hopi mas lihe pasobra Aruba a habri su fronteranan na Luna di Juli 2020 caba, en cambio pa loke ta trata turismo crusero, ta apenas den luna di Juni 2021 Aruba a ricibi su prome barco crusero, y e prome lunanan tabata hopi slow; un recuperacion hopi lento, pero por mira cu esaki ta lanta bek gradualmente.

            Cifranan ta indica cu e ultimo lunanan aki desde luna di Juni ora Aruba a habri su fronteranan pa barconan crusero te Luna di September, a registra 29.480 pasahero, den Luna di October a ricibi 13.300 y ya caba a constata cu den Luna di November y December, lo por mira un cambio substancial den e cantidad di turistanan crusero cu Aruba lo bay ricibi. Pa November tin proyecta cu lo bin 35.00 turista crusero cu ta 31 calls, y pa December tambe ta proyectando 35.000 of mas, y e indicacion ta cu pa aña 2021 lo surpasa 100 mil turista crusero cual sigur ta riba e expectativa cu Ministerio di Turismo y APA tabata tin.