Bo mester sigui renoba carchi cada 12 luna
ORANJESTAD (AAN): Pa hopi decada caba, tur hende na Aruba cu ta traha den horeca y cu ta envolvi cu bendemento di cuminda y mas, tin di busca e asina yama ‘Carchi Berde’ di Salud. Mientras bo ta laborando, bo mester tin e carchi di salud aki den bo poder, y e mester ta vigente.
Pa bo haya e carchi, bo tin di haci acudi na Departamento di Higiena pa haci e aplicacion of renobacion, e ora nan ta dunabo instruccion cu bo tin di bay haci e aspecto medico, e.o. e proceso di haci X-Ray di bo Thorax (awor esaki ta cada 5 aña), y tambe un test fecal (‘sushi’). Na momento cu bo entrega e test fecal, e ora e proceso di 10 dia di trabao ta cuminza.
Ora cu e 10 dia di trabao finaliza, bo tin di corda cu e dia cu ta entrega carchi ta riba e siguiente Diabierna solamente.
E proceso pues a keda mesun cos, y cada aña tin di renoba e carchi berde. E X-Ray di Thorax ta keda cu validez di 5 aña.
