Cu un sistema tropical mas cu por pasa den vecindario di Aruba
*Conferencia di clima ta topa cu menasa OPEC pa prijs coriente
*Rusia ta cera mas cu un siglo di wega terorista cu bom nuclear
ORANJESTAD (AAN) — Na inicio di otro siman, mundo ta drenta luna di November, cu generalmente ta deshaci di preocupacionnan di mundo, cu ta prepara pa eventonan alentador manera Thanksgiving, Sinterklaas, Hannukah, Pasco y Aña Nobo.
Cu na 2022 Aruba ta parti di un mundo cu lo conoce situacionnan cu lo ta advertencia importante pa futuro inmediato di hende, ta basa riba problemanan serio cu lo por topa cu nan culminacion na November 2022.
Generalmente entrada pa November ta indicacion cu temporada di horcan y peliger cu cualkier sistema por ta den vecindario di Aruba, ta baha despues di November aunke semper un sistema por sorprende.
Riba tereno di tempo, Aruba a marca un situacion unico den cual na tres ocasion ya e pais tabata den estado di alerta pa sistemanan cu pasa cerca di Aruba y desaroya despues den horcannan peligroso cu a laga un saldo cruel di morto.
Ayera Servicio Meteorologico di e region di Caribe cu ta traha hunto cu National Hurricane Center di Merca, a cuminsa papia di un cuarto sistema cu por desaroya den un sistema tropical den region di Caribe y pasa den vecindario di Aruba pa sigui direccion pabou.
Pa evita alarma sin necesidad, DIARIO ta menciona e particularidad aki pero ta adverti tambe cu ta spera cu e sistema cu ta wordo bon vigila pa autoridad meteorologico den Caribe, lo por bira peliger ora e pasa Aruba si e sigui desaroya.
Esaki ta nifica cu tecnicamente Aruba ta wordo adverti cu tin cambio den clima, cu ta uno di e asuntonan serio cu lo wordo discuti dor di mundo na November, durante e Conferencia di Clima, den cual lo mester bati alarma grandi pa loke ta bira realidad.
Durante e Conferencia di Clima, e aumento di calor na mundo cu lo provoca mas drama humano pa motibo di desaster natural, pero tambe lo nifica menos alimento disponibel pa poblacion mundial, lo haya tur atencion.
Calor inmenso na paisnan productor di cuminda, a haci cu tin menos alimento disponibel pa mundo ya cu e produccion di suela na cantidad di pais cu ta produci cuminda rond mundo, a baha.
Pobresa creciente lo nifica pa un cantidad mas halto di hende na mundo, falta di alimento y situacionnan sumamente doloroso di hamber.
Decisionnan clave mester wordo tuma enfrente entre otro uzo di gas y petroleo, cu na 2022 a bira motibo di inflacion serio cu a laga hopi hende sin come y sin entrada.
Na November 2022, OPEC lo mester cuminsa baha su produccion manera el a anticipa loke lo por sigui manda prijs halto y aumenta inflacion. Medidanan di clima lo nifica cu OPEC lo sigui uza su arma contra final di petroleo como combustibel importante enfrente e peliger di petroleo y gas pa clima?
Instabilidad ta marca prijs di petroleo te cu ayera y ayera por a mira con prijs a bolbe subi mientras ya na diferente pais, manera na Hulanda a cuminsa papia di entrada di recesion, caida di economia.
Na November 2022, mundo lo haya un bista mas cla riba e caida economico mundial a base di Guera di Ukraine, cu a bira mas cruel cu nunca.
Ayera a cera cu Vladimir Putin menasando cu guera nuclear, cu ta parti di e terorismo Ruso cu for di final di Guera Mundial mundo a conoce como Guera Friu y manesa di Fin di Mundo si uza e bom nuclear.
For di momento cu e poder Comunista na 1917 a presenta su mes na mundo, teror a plama rond mundo den un dictadura cu a mara Comunismo na gobernacion di Union Sovietico loke a wordo kibra despues dor di Gorbachev, loke a permiti pa Boris Yeltsin a bira e prome Presidente di e pais Rusia, despues cu Union Sovietico a stop di existi.
Awe Vladimir Putin cu e atake di Ukraine kier rebiba Union Sovietico na un mundo cu e guera di Ukraine a destrui na momento cu mundo a pensa cu e por subi un caminda positivo nobo pa futuro.
Otro siman lo marca yegada di November 2022, cu lo ta decisivo pa e forma cu mundo lo subi caminda di 2023, cu lo entrega mundo un agenda yena cu responsabilidadnan nobo pa futuro cu lo ta duna solamente un seguridad, cu ta cambio y mas cambio cu lo presenta pa Planeta Tera.
