ORANJESTAD (AAN): Diahuebs mainta, via di un Webinar organiza pa Aruba Tourism Authority, a suministra un monton di informacion y pone spotlight riba algun compania nobo cu a cuminza ofrece nan servicionan, desde cu e pandemia a afecta Aruba.
Y ta trata aki di servicionan cu ta completamente diferente cu antes. Esakinan ta cay bao di categoria di ‘niche experience’.
Durante e Webinar, a mustra video di e.o. un compania local nobo ‘Bell Tent Experience’ di Andrew y Jenny cu ta ofrece sea hende local of turista, chens di goza di un picnic bunita prepara riba beach banda di lama. Tambe a mustra un video di e compania local nobo ‘Salty Hikes’ di Cado de Lannoy.
Tur esey den cuadro di World Tourism Day, cu ta oficialmente Dialuna 27 di September 2021, pero cu ATA a dicidi na festeha riba Diahuebs 23 di September. E anfitrionnan di e Webinar tabata Mark Benson Denz y Jennifer Richardson
Un di esnan cu a hiba palabra na e Webinar tabata Isha Kock kende ta den Product Development na Aruba Tourism Authority, cu a mustra cu nan a lanza Aruba Signature Experience cu kier empuha pa mas compania asina habri pa cuminza ofrece turistanan e tipo di servicio aki den 2022.
Isha a mustra cu ATA kier pusha mas e servicionan di calidad riba e isla. Mescos cu esun cu a lanta caba pa ofrece servicio di picnic, y a bin demostra cu esey ta atraccionnan cu turistanan kier ricibi riba un isla. ATA tin algun proyecto den pipeline cu por yuda turistanan den tur aspecto ora cu nan ta riba e isla, incluyendo bishitanan na lugarnan y haya guia pa saca potretnan unico, pasa un momento di ‘zen’ ora di core rond di e isla, y asina crea un plan di espacio pa nan por tin e experiencia cu nan lo kier ricibi na Aruba. Pues tin di bay planea y haci esaki accesible, intriguo, y pone nan pasa momentonan special.
Por ehemplo si nan bay Faro di California, nan por hay aun momento perfecto pa saca potret. Pues pesey ta prepara un experiencia specialmente traha pa e turista ey, eynan mes na e Faro di California.
Esey ta un di e tantisimo proyectonan cu nan lo kier cuminza ofrece turistanan, pa asina di 2022 en adelante e bishitante lo tin un variedad mas amplio di ‘experiencia’ cu nan por haya na Aruba ora di yega e isla.
