ORANJESTAD (AAN): E campaña di vacunacion contra COVID-19 na Merca ta a punto di drenta den un fase nobo y importante:
Diahuebs, asesornan di gobierno a recomenda aplica un dosis di refuerzo di vacuna di Pfizer na miyones di mericano. Esaki a tuma lugar apesar di preocupacion di algun experto cu dosis adicional lo haci poco pa maneha e pandemia.
E grupo asesor di Centro pa Control y Prevencion di Malesanan (CDC) a recomenda un dosis adicional pa personanan di 65 aña bay ariba, residentenan di casnan di cuido y personanan entre 50 pa 64 aña cu condicionnan preexistente. E dosis adicional lo wordo administra asina cu, por lo menos, seis luna a pasa desde cu nan a haya e ultimo dosis di Pfizer.
Dicidi ken mas por ta elegible pa un 'booster shot' tabata hopi mas complica. Apesar cu ta existi poco evidencia cu personanan mas hoben ta den riesgo di disminucion di inmunidad, e panel a ofrece opcion di un booster na personanan di 18 pa 49 aña cu problemanan cronico di salud.
E recomendacionnan di Comite Asesor riba Practicanan di Inmunizacion a tuma lugar un dia despues cu Agencia di Alimento y Remedinan (FDA) a emiti un autorizacion di emergencia pa cu personanan di 65 aña of mas, como tambe pa esnan cu trabao ta pone nan den mas riesgo di haya Covid, cu a ricibi vacuna di Pfizer Inc. y BioNTech SE a ricibi refuerzonan. Anteriormente a emiti un autorizacion cu tabata ofrece dosis adicional na personanan cu sistemanan inmunitario debil.
FDA, agencia cu ta regula comercializacion di remedinan, a autoriza un di tres dosis di e vacuna di Pfizer tambe pa mayornan di edad den riesgo di salud of specialmente exponi na Covid-19, manera trahadornan di salud, maestro, cuidador, empleadonan di supermercado y presonan.
“E decision aki ta demostra cu ciencia y datonan actualmente disponible ainda ta guia nos na momento di tuma decisionnan relaciona cu vacunanan contra covid-19 durante e pandemia”, segun director di FDA, Janet Woodcock.
E decision di FDA a tuma lugar den pleno debate na Merca riba necesidad di administra un di tres dosis na henter e poblacion y riba nivel mundial, mientras otro paisnan ainda no tin suficiente vacunanan.
