ORANJESTAD (AAN): Stichting Hunga Teca ta celebra nan di dos aniversario. Nan ta duna e muchanan di 0 pa 12 aña e oportunidad
di desaroya nan habilidadnan cognitivo, creativo, social y mental, a traves di wega, coi hunga y salidanan den un entorno safe y cariñoso bao guia di profesionalnan.
Pa medio di e colaboracion cu varios organizacion na Aruba, por a yega na mas mucha, famia, tutor y profesionalnan. Por ehempel, a desaroya tayernan cu otro organizacionnan pa mayornan y profesionalnan pa educa nan riba e importancia di e wega.
Durante e pandemia por a yega na mas mucha door di reparti saconan cu coi hunga y weganan ora cu e famianan tabata piki nan pakete di cuminda.
Un fundacion, y un señora cu curazon grandi na San Nicolas, a haci posibel cu por a duna e muchanan un dia di diversion descubriendo e naturaleza di Aruba, bayendo cinema y participando den actividadnan deportivo.
Stichting Hunga Teca tin un agradecimento special na e personanan y empresanan cu a haci donacion di coi hunga, di tempo, servicionan y placa pa asina por a haci tur esaki posibel.
