ORANJESTAD (AAN): For di Diamars 8 te cu Diabierna 11 di April, secretario di estado Zsolt Szabó lo bishita Aruba y Curaçao. E bishita di trabao ta den cuadro di sera conoci cu e gobierno nobo di Aruba, e consulta di gobernadornan na Curaçao y hiba combersacionnan tocante e temanan bon gobernacion y accion.
Bishita na Aruba: E bishita di trabao ta inicia riba diamars 8 di april na Aruba. Szabó ta topa cu entre otro e ministernan di e gabinete nobo, bou di guia di Mike Eman, cu recientemente a tuma asiento. Banda di un combersacion cu e team di minister nobo, e minister Hulandes ta papia cu miembronan di parlamento di Aruba.
E bishita na Aruba ta den cuadro tambe di bon gobernacion. Asina señor Szabo lo atende un charla di Mieke Droog, director di programa di e instituto Arubiano pa gobernacion y liderazgo na Universidad di Aruba. Na e campus e ta participa na un sesion di pregunta interactivo cu studiantenan.
Para economicamente riba propio pia ta, banda di bon gobernacion y finansa solido, un di e puntonan di lansa di Szabó. P’esey e ta haci apertura di e sucursal nobo di e compania di instalacion tecnico Pro-Tec na Aruba. Recientemente e compania a ser cumpra pa e compania Hulandes Van Dorp y ta specialisa den friamento di edificionan haciendo uzo di awa di lama.
Bishita na Curaçao: Na Curaçao e secretario di estado ta participa riba 9 april na e prome consulta di gobernadornan di e aña aki. E consulta bienal aki cu e gobernadornan di Curaçao, Aruba y Sint Maarten ta tuma luga, beurt pa beurt, na Hulanda of na un di e paisnan Caribense.
Na Curaçao Szabó ta papia cu entre otro prome minister Gilmar ‘Pik’ Pisas y ta topa representantenan di ‘Curaçao Transparente’. E fundacion aki ta ocupa su mes cu prevencion y combatimento di comportacion no-integro y corupcion na Curaçao.
Riba diahueps 10 april Szabó ta papia cu Anouschka Cova, director di Curaçao Hospitality and Tourism Association (CHATA) y cu Miles Mercera, director di CINEX, Curaçao Investment & Export Promotion Agency. Ambos combersacion ta bay tocante desaroyo economico riba e isla.
Na consulado Mericano na Willemstad Szabó tin un encuentro cu e Consul General nobo, Ramon Negron. Den cuadro di bon gobernacion y con pa atende cu minamento (ondermijning), Szabó ta papia entre otro cu Recherche Samenwerkingsteam (RST) y Procurador General Guillano Schoop.
Riba diabierna 11 di april, señor Szabó, hunto cu e minister di Finansa di Curaçao, señor Silvania, lo bishita douane na waf di Curaçao. Despues di esey, na Aeropuerto Hato representantenan di Koninklijke Marechaussee lo informa señor Szabó tocante control di frontera.
Finalmente, e secretario di estado lo participa na un parti di e reunion di consulta di e gezaghebbers di Bonaire, Sint Eustatius y Saba cu ta tuma luga na Curaçao.
