ORANJESTAD (AAN): Diahuebs mainta Parlamentario Evelyn Wever-Croes hunto cu Parlamentario Rocco Tjon a
bishita Fundacion Respetami cu ta e fundacion cu ta traha riba prevencion di abuso di mucha.
Parlamentario Wever-Croes a indica cu durante gobernacion di Gabinete Wever-Croes II, e tema di abuso sexual contra nos muchanan tabata uno di gran prioridad. Pa e motibo aki Gobierno anterior a entrega un mocion den Parlamento pidiendo fondo adicional pa dicho fundacion. Lamentablemente esaki no a worde duna.
Segun Parlamentario Wever-Croes, si Gobierno kier traha na bienestar di pais Aruba, ta importante pa nan sigui enfoca riba prevencion di abuso contra nos muchanan. Esaki ta e motibo principal pakico Gobierno anterior a bin cu e mocion aki.
E modelo di turismo a worde cambia y ta bisa “Aruba One Happy Island” pero si nos kier crea di berdad un isla feliz, nos mester cuminsa percura pa e isla ta feliz pa su ciudadanonan. Paso un isla cu a dushi pa biba riba dj’e ta un isla dushi pa bishita. Esaki ta e meta y ta esaki nos mester sigui traha riba dj’e.
“Gabinete Wever-Croes II a crea un espacio financiero di 500 miyon Florin cu e speranza cu e Gobierno actual inverti den e capital humano di pais Aruba, paso asina so lo por papia di progreso y bienestar. Cu e informacion colecta den e reunion cu Fundacion Respetami, fraccion di MEP lo sigui traha y bringa pa e fundacion haya su fondo adicional pa asina por sigui traha na prevencion di abuso contra nos muchanan” Parlamentario Wever-Croes a expresa.
