Sentencia impactante den Caso Avestruz
- Si e no por paga e lo tin di bay 900 dia den Prison
- Hues rechaza defensa di e ex-Ministro
ORANJESTAD (AAN): Diahuebs mainta, Hues di Corte den Promer Instancia a bisa cu Benny Sevinger ta culpabel di malversacion di 840.051,91 Florin y cu e mester paga esaki back na Gobierno. Si Sevinger no paga, e lo mester bay 900 dia cera.
Hues a rechaza defensa: Benny Sevinger a presenta den Corte di Husticia pa scucha su sentencia, hunto cu abogado mr. D. Kock. Hues den su sentencia a bisa cu Fiscal a pidi pa trata e caso mientras cu abogado mr. D. Kock ta haya cu segun ley, no por bay condena Benny Sevinger, tanten cu no tin sentencia definitivo di Corte Supremo. El a pidi Hues pa warda te ora tin un decision di Corte Supremo.
Hues a bisa cu Corte Superior riba 12 Juli 2024, a haya ex minister Benny Sevinger, cu a apela su condena den caso Avestruz, culpabel y a conden’e na 48 luna di prison, ademas a kita e derecho pa e ta un ambtenaar.
Hues a mustra cu contrario na mr. Kock, hurisprudencia di Corte Supremo ta mustra, cu ley ta permiti cu mientras cu ta warda riba e decision di Corte Supremo, por tuma decision riba e caso di kita propiedadnan. Hues a rechaza e defensa di mr. Kock.
Hues a reduci suma exigi pa Fiscal: Ta asina cu durante tratamento di e caso di kita propiedad di Benny Sevinger, Fiscal a exigi pa Benny paga mas di 191 mil Florin y si Benny no paga e lo mester bay 3 aña sera den prison. Fiscal ta haya Benny culpabel di malversacion di placa.
Ayera mainta Hues a bisa cu el a bay evalua tur e calculacionnan haci y ta yega na un otro conclusion cu Fiscal. Envez di 910 mil Florin, Hues ta yega na 840.051,91 Florin.
Of ta bay 900 dia encarcela: Hues a bisa cu e ta comparti punto di bista di Fiscal den gran parti. Por a nota cu e decision di Hues ta mas abao cu loke Fiscal a exigi. Hues a condena Benny Sevinger na paga 840.051,91 Florin na Gobierno. Hues a sigui bisa cu si Benny Sevinger no paga, e lo mester bay 900 dia sera den prison.
