Fundacion Pa Nos Muchanan a bolbe organiza exitoso programa pa mayor 'Stima Mi Guia Mi'

ORANJESTAD (AAN): Durante e lunanan di Maart y April, Fundacion Pa Nos Muchanan a ofrece un biaha mas e programa di ‘Stima Mi Guia Mi.

E biaha aki a enfoca riba mayornan cu tin yiu entre 0 – 12 luna. 15 mayor a participa hunto cu nan baby, cual 9 ta mama y 6 ta tata. E interes di parti e mayornan pa participa tabata uno sumamente grandi.

E programa a consisti di 5 sesion unda nan a ricibi diferente charla di parti Fundacion Pa Nos Muchanan, Fundacion Respetami, Centro Hoben y Famia, y Tienda di Educacion.

Na cada sesion, e mayornan a participa hunto cu nan baby, na unda nan a toca e temanan di: E importancia di e prome añanan, kico ta un mayor sensitivo y responsivo, e importancia di un laso sigur entre mayor y yiu, hungamento sensitivo y responsivo pa un miho desaroyo, y e bienestar di e mayor.

Cada encuentro tabata yena cu informacion y actividadnan cu mayornan por a haci hunto cu nan baby y pone locual nan a siña den practica.

Fundacion Pa Nos Muchanan kier a felicita tur e participantenan y alabes gradici Kiwanis Club of Palm Beach, Tienda di Educacion, Fundacion Respeta Mi, Stichting Wit Gele Kruis y Centro pa Hoben y Famia pa nan sosten durante e ultimo simannan.