ORANJESTAD (AAN): Ministerio di Salubridad Publico Aruba ta colabora regularmente cu e organizacion Pan Americano di Salud (PAHO) pa cuminza proyectonan di concientizacion,
cooperando cu e organizacion internacional aki cu tin sumamente hopi experticio pa asina brinda mas informacion na comunidad y promove salud na nivel regional.
E cooperacion aki lo ta uno esencial pa yuda concientiza riba e importancia di prevencion di malesa a base di estilo di bida sano. Cu sosten di PAHO, conhuntamente cu agencia di mercadeo local JDB, lo provee guia na e comunidad di Aruba pa hiba un estilo di bida mas saludable.
Bo estilo di bida, ta e miho medicina! E campaña lo worde promovi bao nomber di ‘Bo estilo di bida, e miho medicina’ cu enfoke na reforsa nos sistema imunologico pa preveni malesa, como tambe brinda informacion y concientizacion al caso na con pa preveni impactonan severo di malesanan manera Covid-19.
Desde e comienzo di e pandemia, algo cu a bini dilanti y cu gobierno hunto cu organizacion di salubridad ta hopi na altura di dje, ta e hecho cu comunidad en general ta sinti nan mes limita por medio di medidanan di siguridad pa combati Covid-19.
E campaña aki tin como proposito pa duna cada individuo e libertad di hiba un bida mas sano, pa yuda cada un di nos crea habitonan pa mehora nos sistema immunologico, mas resistente na Covid19 y otro problemanan di salud, sin opresion ni restriccion. Simplemente brindando e comunidad di Aruba e guia necesario pa stimula un bida mas saludabel di forma gratuito.
Reto gratis cu guia di Profesionalnan di Salud: E temanan cu lo worde adresa durante e campaña aki ta Nutricion, Ehercicio, Drumimento, Humamento, Alcohol, Sobreuzo Digital, Salud Mental, Higiena y Comemento Emocional.
DIARIO a haya sa cu den colaboracion cu diferente expertonan y profesionalnan den tur e areanan aki lo ofrece un Reto di 30-dia pa tur interesado por participa gratis cu guiansa y tips di con por mehora den cualkier di e areanan aki den nan bida y haci un cambio.
Den un Facebook Group priva esnan interesa den haci un cambio positivo pa mehora nan defensa por asisti na e challenge y sostene otro participantenan cu guia di expertonan den salubridad.
Mas informacion ta obtenibel ariba e website www.arubasaludabel.com pa yuda bo identifica cual topico ta di mas interes pabo y pa siña mas tocante di e campaña aki.
Comunidad di Aruba ta cordialmente invita pa forma parti di e programa aki activamente y tambe pa recomenda esaki na un otro persona cu bo ta haya lo ta algo positivo pa e forma parti di dje.
{gallery}Ministerio di Salud Publico hunto cu DVG y PAHO habitonan saludabel na Aruba{/gallery}
