Tin di check pulso di produccion local prome
ORANJESTAD (AAN): Directora di Departamento Economico, esta Maria Dijkhoff Pita a indica cu Ministerio di Asuntonan Economico algun luna pasa a haci un sondeo unda a invita varios compania of persona pa sea habri un Chickenfarm pa webo, y tambe check esnan cu kier amplia nan Chickenfarm existente, pa nan inscribi nan mes.
Un total di 20 compania a inscribi nan mes, y awor tin un Comision di diferente Departamento encarga cu esaki, pa asina check den ki forma por asisti nan pa nan por aumenta of produci reto.
Pero segun señora Dijkhoff Pita, tin algun reto, y principalmente ta tereno pa habri Chickenfarm. Tur hende sa cu na Aruba tin scarcedad di tereno, y awor pa bo haya espacio pa bo por cuminsa cu un criadero di galiña, no tin tanto disponibel. Pesey e Comision ta haciendo analisis pa mira con, y kendenan por bay produci mas webo.
Permiso pa importacion: Manera cu DIARIO a trece dilanti caba den edicion di Diasabra, hecho ta cu productornan local di webo na Aruba cu ta bende webo bruin, ta protehi pa ley. Esnan cu kier importa webo di exterior, tin di pidi permiso di Gobierno. Nan por haya permiso, pero solamente pa importa webo blanco.
Tabatin indicacion cu companianan recien a pidi permiso pa importacion, pero no a haya esaki. Segun Directora Dijkhoff Pita, si un compania a haya 1 permiso caba, no por ta cu nan ta keda sin haya e di dos permiso.
Aworaki tin 14 compania na Aruba cu tin permiso pa importa webo. Webo ta ser treci for di Merca, di Hulanda, y awor tambe di Colombia. Tur compania por dicidi di unda nan ta importa webo, tanten cu nan ta webo blanco.
Sa si cu tin compania cu kier bira importador pa 1er vez di webo for di Colombia. E companianan aki di 1er vez ainda no a haya permiso pa haci esey. Pasobra Departamento di Asuntonan Economico ta wardando luna di Januari yega, pa asina bolbe haci un sondeo ta cuanto e produccion local ta, y a base di e cifra di produccion na Aruba mes, e ora lo duna permiso na importadornan. Si e momento ey a mira cu e cantidad cu tin di wordo importa ta bira hopi grandi, e ora nan tin dos escogencia: (1) Sea ta duna e companianan cu tey caba permiso pa importa mas hopi webo. (2) Of ta duna par di compania nobo e permiso pa nan tambe importa webo.
Segun e Director, esey ta algo cu tin di wordo evalua ainda.
El a mustra cu durante henter aña, nan ta flexibel den dunamento di permiso. Pasobra si un compania ta manda pidi permiso pa importa 500 caha, y analisando e mercado local ta mira cu tin necesidad di mas webo, e ora nan lo por informa e importador cu e mag di trece mas cu 500 caha. Tur esey ta basa riba trend di cada temporada.
Pues otro biaha cu no mester di importa hopi webo, e ora lo cambia e permiso y reduci e 500 caha ey te na 300 caha cu por wordo importa. Ta tur siman e calculacionnan ta wordo haci.
Departamento di Asunto Economico tin prijs poni pa webo local, pero no tin esey pa webo importa. Cada importador ta liber pa pone prijs cu nan ta sinti e producto bal na momento di a haci e bestelling. Y e prijs ta varia masha hopi.
